Ka chnat rel ka ri namo ka Indian Railways ynne da sdang ko ya ka “Meri Saheli” neibynta i chngaaiñ ki kynthai ha waroh ki bynta (Zones) ka ri neibynta wow yada ya ki khynthai khynnah heipor wa lai luti ki da ka rel nadooh wa sdang i lai luti hadooh wa poi i thaw wa thmu ki wow lai.
Ini toh katkam i thrang ki pulit Railway Protection Force (RPF) heiwa hapoh kani ka kaam daw yaklam ki pulit kynthai ya ki kynthai khamtam kiwa lai luti samen da ka rel heiwa daw pyntip ya ki kammon u yada ki pyn daki ya ki hi wei wow Phone ha u 182 lada chem chitom ki. Hadien ini ki RPF daw chim ki ya ka Seat Number wei wow e yarap ya kini ki kynthai ha luti.
Ha ki thaw wa thmu ki kynthai u hiar, ki RPF daw chim yutip ki na kini ki kynthai khnang wow ye u pynjanai yei chakri wa e ki (RPF) wei lada jia wa em wa paan yarap na ki rel “Meri Saheli” daw booddien yeini i e yarap da ki heh pulit kani ka chnat pulit.
Kani ka “Meri Saheli” toh kawa man kam i pyrchang namo ka Pilot Project ka South Eastern Railway ha u Naikhynde 2020 wei hadien wa yoh mynsien wei pynchlur na ki kynthai wa lai luti da rai noh wow pynkrehkaam ya ka ha waroh ki bynta (Zones) nadooh ka 17-10-2020.