U Symbood Montri Rangbah ka jylla, u Prestone Tynsong da ong u wa ka sorkar kwah ko wow pyntikna wa kiwa chong chnong ka jylla u lait ki nei maa na u khñiang kjut heiwa da chim leh ya ka rai wa ki bru wa wan na baar ka jylla hanla dep chim tika ki ar sien leh emkaam wow pynyoo ya ka RT-PCR Test wa leh hapoh 72 kynta wa ym em chah ktah ki ha uni u khñiang wei emkaam wow Test biang ha ki khyrdop wow psiah cha ka jylla.
Ya ini da ong u Prestone hajrong i chah pynbaad wa i chah beiñ ya i rai ka sorkar wow Test lut ya ki bru wa wan na baar kiwa wan psiah cha ka jylla Meghalaya. Da ong u wow yada na i maa, ka sorkar da sñiaw emkaam ko wow pynkhor nadooh ki thaw psiah.
Chooh chooh da ong u wa ym mut wa tangwa dadep chim tika ym bi de u khñiang, da pynrap u leh wa wot ki bru wa wan na ki thaw wa chit wa ki jylla wa chah ktah biang ha u COVID-19 emkaam wow chah Test wei wow pynyoo ya ka RT-PCR Test Result hanla dadep chim tika.
Da ong u leh wa i pyrkhor ka sorkar toh ya waroh ki bru lada kiwa wan uiñke suwari næ wot kiwa chong wa sah ha kani ka jylla.
