Kawa e ktien yong ka National People’s Party (NPP), ka Dr. M. Ampareen Lyngdoh da ong ko wa iwa yoosuk ha kani ka Election toh wa kiwi ki seiñ em ki ya kitæ ki heh yalap eEection, katwa ka NPP kawa man leh kam ka National Party na kani ka jylla em ki du para ki wow yaklam pynsñiawthooh ya ki paidbah.
“Ka jaitbru yong i ymtoh kawa mane ya kiwa yahkhmat, i toh ka jaitbru wa ngait wei ap wei kawa burom ya kiwa yahkhmat tangwa i ym jooh mane lane beh kam ki biej,” da ong ko.
Hawa yatoh wa i wanrah kiwi ki National Party ya kiwa yalap Election wa paawnaam, da ong ko wa toh i daw bah wa ki 8 ngut ki MLA yong kiwi ki Party da lai psiah ki cha ka NPP neidaw wow pynkhlan ya ka seiñ kawa na kani ka jylla hi.
“I cheini tip i wa ki paidbah ka jylla ki bood ki ya kiwa yahkhmat, ym bood Party neibhah ym em ki ya kitæ ki bru wa da chah pynbaptis ha katu ka seiñ,” da ong ko.
“Kitæ ki Political Party kiwa da wan yah lut ya kitæ ki Actor Actress wow wan pynchit cha kani ka jylla, ha ka NPP i em i para i, kawa yahkhmat da i neibynta yong i,” ong ka Ampareen deiwa kyntu leh ya ki paidbah wym toh u chah pynbiej de.
“Nga ym tharai O wa ki paidbah ha Shillong toh kiwa biej Actor Actress hadooh kattæ kattæ,” da ong chooh chooh ko.
Hawa yatoh wa ki heh sorkar na Delhi kiwa da wan wow yalap Election cha kani ka jylla da ong ko, “Uyi wow dang nood toor chooh cha kitu hawa ki pulit wa yang leh da yoo chyrkhei, du wow poi cha jan yong ki leh kawa eh.”
“Nga da em O ha ka seiñ Congress la kattu wei da yachem wa boon ki jynjar, i sñiaw doohnong ya i por yong idæ,” da ong ko.
Heijooh i por ka Ampareen da ong ko wa i wan yah ya ki Actor Actress wa kiwa yahkhmat ha ka Election kiwa na baar toh i pynlut na ki Party ya kawa hap ki wow e yukheiñ.
“Ka Election toh kawa yakhun para i, heini yachong i para i wei ka Election leh toh neibynta ka yong i, nga sñiaw wa ym man iwa emkaam wow wan ki bru kiwa na baar,” da ong ka Ampareen.
