U Working President ka People’s Democratic Front (PDF), u Banteidor Lyngdoh uwa man leh u Montri ka sorkar jylla da ong u wa kam ka seiñ kawa krehlang wa ka sorkar kwah ko wow pynneh ya i synchaar khadar, tangwa ki paidbah da tip bha ki wei da bichaar ki leh yeini.
Yeini da ong u hawa kylli hajrong i em chiboon i chah pynbaad ka sorkar Meghalaya Democratic Alliance (MDA) wa yahkhmat da ka NPP wei wa da synrop lang da kiwi ki seiñ wa ki MLA wa samen.
U Banteidor da ong u wa kam ki seiñ wa em ha ka sorkar kwah ki wow pynneh yei synchaar wei ka seiñ ym kwah ko wow yoo wa ka sorkar u haap ko du hapoh 2-3 snem neibhah daw thut ki kaam pynroi ha ka jylla.
Heiyatoh won wa ki kaam rep wa ki kaam yalehke kiwa ksoh u kam u Montri, da ong u wa em chiboon ki myntoi wa da yoh kiwa chong chnong wei ym kwah u wow luchia ya ki kaam kiwi won wei ki paidbah daw bichaar ki yeini.
Ha iwi i liang hawa kylli won hajrong i kam u heh ka UDP wa ki seiñ wa khian wa kynthup ya ka PDF, ki paidbah daw kyntait noh ki ya ki ha ka Election MLA 2023, u Banteidor da ong u wa da jan ka Election wei daw em bait kiwa klam, tangwa hanla ka PDF man ko ka Party kawa dang khian leh em won ko ya ka yurim wa skem deiwa kam leh wa ka PDF daw jop ko rap boon ha kani ka kynti.
Hajrong i rai ki ar ngut ki MLA wow mih na ka Party, u Banteidor da ong u wa ym ktah ko ya ka Party neibhah ha kitu ki Constituency da yoh ya ki kyrtong ki wow yakhun ya ka Election ha u 2023.
