Ka MDC na Nongshkhen kawa da lai psiah cha ka National People’s Party (NPP), ka Grace Mary Kharpuri da ong ko wa ye wow kylliang Uniform 100 sien, tangwa i man yong ka ym kylla i wow kreh neibynta ki paidbah.
Ka Grace da ong ko ya ini ha ka yalang wa lai pynyabi noh ko waka NPP, heiwa da emlang leh kiwa kyrchaan na ka Shella Constituency. Ka Grace da jop ko kam ka MDC nadooh u snem 2009 na Nongskhen wei ha u snem 2019 da jop ko na ka seiñ Congress tangwa da mih noh ko na ka Party wow yakhun ya ka Election chiteiñ samoi na Shella.
Hawa klam ha kani ka sngi, ka MDC da pynsñiaw ko yei sñiawsih yei chah khut kam ka bru para deiwa sñiawthooh bakla kiwa yakhun pyrchah, deiwa pynsñiaw wa lada ya nujor wa ka Shella, ha Nongshken man ko kam ka bru para, tangwa ki paidbah katai ka Constituency da jied ya ka nadooh u snem 2009, deiwa ong leh wa ha Shella Constituency ka ym toh ka bru para.
Ha iwi i liang, ka Grace da ong ko leh wa i daw wa psiah ko cha ka NPP toh hadien wa da bichaar bniah bha, hanla em i chah pynbaad wa ka Grace kynthih ko na kawi ka Party cha kawi, deiwa jubab wa kitu kiwa klam e u klam ki cheitu.
Da ong ko wa ka NPP ka em ko ya kiwa yahkhmat wa biang, wei da yaroh ko ya u Montri Rangbah wa man u u bru wa leh khian wei uwa smat wow ap hanla man ki du kam ki MDC, da yaroh ko leh ya u Prestone uwa sñiawthooh hanla em i yaleh pyrchah ha ki por wa dep ha ka Election.
