U Montri Rangbah ka Meghalaya, u Conrad K. Sangma da ong u wa ka sorkar hanla da maad ko chiboon i eh i khoo heiyatoh wa ka puræ puthi tangwa da kreh chitom ko wow pyntikna wa ki khynnah ka jylla u yoh ki yei puræ puthi wa biang tam.
“Lada ye i wow wanrah yei kaam wa biang kam ki Policy daw ye u poi cha ka thong hanla daw chimpor yow pynoo wa ka Meghalaya u man ko kam ka thaw wa e yei puræ puthi wa kiwi wow bood ki,” da ong u Conrad hawa klam ha ka lehkmen Golden Jubilee ka St. Thomas Higher Secondary School ha Mairang, Eastern West Khasi Hills ynnin ka sngi.
Da ong u leh wa ka Meghalaya da sdang ko hei luti wow man ka wi na ki jylla wa bha tam hapoh ka ri wei ka puræ puthi em ko hakhmat dooh heiyatoh wa ini deiwa pynrap wa yow poi cheini daw hap wow jop ya iwa boon iwa eh yow pynkylla dur yeini wei ym toh iwa suk wow leh ha waroh ki thaw wa em cha sor wa cha palatsor.
Da kdaw u leh wa ha u 2018 ka jylla da em ko cha tre dooh ha kiwa boon ki kaam tangwa katni da ku ini waroh.
“Ka jylla da em ko cha tre dooh hei e tika ha u 2018 wei ha kini ki soo snem ka jylla da ku ko na 27 cha iwa 2 katni. U kreh i leh wow pynku ya waroh ki liang nadooh ki kaam uiñke suwari, i chait i khiah wa i seiñ khih,” da ong chooh chooh u.
Ha ini i lai u cha Mairang, da booh u leh ya u mooyurim ka thaw paitke namo ka Gallery ka St. Thomas Football Ground wei da pynkup burom u ya ki khynnah ka skur kiwa da lehbha ha ki Exam, da wai u leh ya ka Computer Laboratory ka Mairang Presbyterian Science College kawa da chna hapoh ka Chief Minister’s Special Development Fund hei lut wa T. 6.77 lakh.
Da yaroh u leh ya ka College wa da pynemkaam hok ko ya ka poisa deiwa ong wa kini ki Computer daw yarap bha ki ya ki khynnah.
Da lai u leh wow chimbynta ha ka College Week ka Khadsawphra College, Mairang heiwa da wai u leh ya ka yung thymme (Extension Building) wa ki Bus kani ka College.
Da pynbna u leh ya ka poisa yarap kawa T. 20 lak naka CMSDF yow chna pyndep ya kani ka yung Building ka College.
