Ka Result SSLC yong uni u snem 2021 da wanrah ko yei kmen wa i sñiawsih ya kiwa boon tangwa i mynsien raikut yong u Heimonmi Synnah da man i ka nongmuna ya kiwa boon wow bood ki wei iwa yoh yaroh na kiwa boon walang.
U Heimonmi Synnah toh u khon ka Aimaia Synnah wa u Bneiñ Lamare wei man u uwa ynñiaw na ki phra ngut ki chipayu na ka chnong Laskeiñ, West Jaiñtia Hills wei man u khynnah uwa duna ha ki kti nadooh wa dang khian wei da pyndep u ya ki kaam yong oo wa i thoh ya ki Exam toh deiwa pynemkaam da ki kjat donhi.
Ha u snem 2020 u Heimonmi da yaleh u ya ka Exam SSLC na Mowkaiaw Higher Secondary School tangwa ym em u lait u ka wei dei mynsien wa raikut da yakhun biang u ya kani ka Exam hadooh wa da ye u lait ha uni u snem.
Hawa yaklam wa u Heimonmi da ekhublei u ya ka Principal ka Sawlyngdoh Higher Secondary School wa da pdiang ko ya oo ha kani ka skur wei kamjooh kiwa sikai kani ka skur kiwa da yarap kyllooid mynsien ya oo ha i puræ puthi.
Neiliang u Shiningstar Synnah uwa man u payu yong u Heimonmi da ong u wa i jop yong u Heimonmi man ko i jop yong ka yung ka sem wa ka skur hi waroh kawi heiwa da dap u dei sñiawngooh wa kiwa sikai ha ka skur wa lai u da wan ki chaphrang wow pynbait ya i eh i khoo wa u Heimonmi yachem u.
Da ong u wa nachwa ki bru jooh ong ki wa kani ka skur (Sawlyngdoh) man ko kawa duna tangwa ha kani ka kynti da ye ko wow pynmih ya u Wanteibok Pator uwa da psiah ha ka 2nd Position yong ka Result SSLC deiwa kitbok leh ya u Wanteibok wow tia chooh u chaphrang ha i puræ puthi wei wow rahnaam rahburom chooh u ya ka skur.
U Shiningstar da kyntu u ya ki manyung kiwa em ki khon wa ki payu kiwa duna ha i doh i pran yong ki, wa ki em ki jar jiar i sap katwa kamtæ ymtoh u man ki kiwa doohmynsien neibhah ini toh i mon yong u Blai wei i kaamram yong ki toh wow pynchlur wow thooh ki luti ki laad ya ki.
Da ban u leh deiwa ong u wa ymtoh wow yang du na ka sorkar tangwa emkaam wow thooh kammon wow pynsuk ya ki wei ka yung ka sem toh u khroh u kreh ko ya ki neibhah kam kiwa dap wa biang toh i kaamram yong ki neibynta i bha yong ki kiwa em i duna, deiwa kyntu leh ya kiwi kiwa em i duna ymtoh wow doohmynsien ki.
Neiliang u Heimonmi da kyntu u ya ki lok yong oo wa kiwi tawon ki khynnah wa ymtoh u doohmynsien ki lada Fail ki ha kani ka Exam tangwa emkaam wow yaleh biang ki neibhah kam oo leh da Fail u ha u snem wa dadep tangwa da yaleh biang u ha uni u snem hadooh wa Pass.
U Heimonmi da kyntu u leh ya kiwi tawon kiwa duna ha i doh i pran wa toh u em ki i kyrmen neibhah kamwa da phah u Blai emkaam wow pdiang ya itæ, wot ki bei ki pa wa ka yung leh toh u pdiang u hun ki yeiwa u Blai da e u. Kamjooh leh da e khublei kyrpang u ya u Nehemayah Tyngkan uwa da e mynsien wa da pynchlur ya oo wa ya ka yung ka sem neipor cheipor.
Puræ leh: Hanla duna ki kti, lai bait i yaleh Exam SSLC uwi ha Mowkaiaw
