Hadien 10 snem i lai luti ka Khliehtyrshi Secondary School, West Jaiñtia Hills District wow e i chakri lyngba i tip i stat hapoh i pait i pynlai ka Dorbar Chnong Khliehtyrshi nadooh wa seiñ ya ka, ynne ka sngi da man ka sngi wow sah kynmoo ya ka skur kamjooh ya ka chnong Khliehtyrshi, heiwa hadien i biang ka Pass Percentage yong ki khynnah wa yakhun Exam SSLC ka MBOSE na u snem cha u snem, ha uni u snem da rap ku chooh chooh kani ka skur lyngba u khon khynroo ka chnong Khliehtyrshi hi, u Lakhon Dkhar uwa da lehbha haka Result SSLC 2026 deiwa yoh Distinction ha waroh ki Subject wei yoh u leh 86.83%.
Kamtæ heiyatoh wa kani ka naam ka burom, ynne ka sngi neiliang ka Dorbar Chnong Khliehtyrshi chirup kiwa sikai deilang u MDC ka thaaiñ, u Madonbai Rymbai uwa man leh uwa seiñ wa sdang ya kani ka skur da chim ki ka bynta u pynkup burom ya u Lakhon Dkhar wa kiwi tawon ki 14 ngut wa da Pass haka SSLC yong uni u snem, heiwa napyrdi kini, 4 ngut toh kiwa yoh hei kyrdan 1st Division deilang ki Distinction ha ki Subject waphær waphær, katwa 11 ngut won kiwa yoh hei 2nd Division.
Ha ka yalang pynkup burom wa pynlai da u Kitbok Rymbai, Waheh Chnong Khliehtyrshi, chim u leh ka laad wow pyn-eh-daw ya u Lakhon Dkhar yow nang ku chooh chooh u chaphrang hei puræ puthi, wei kiwi won ki para khynnah skur leh u pait ki ya ka nongmuma yong oo.
U Madonbai Rymbai, MDC ka Amwi Khliehtyrshi uwa da man leh kam u kongsan ha kani ka sngi, hawa klam dap u dei sñiawkmen wow yoo ya ka skur wa da embynta u hei wow seiñ wow sdang ku ko na ki snem cha ki snem.
Hawa pyn-eh-nasib ya waroh kiwa da pyndep ya ka SSLC khamtam ya u Lakhon Dkhar uwa da lehbha, ong u wa uni u khynnah da pynyoo u wa i dooh i duk ym em khanglaad ko ya oo u poi chakhmat kamwa da wan u na ka yung wa duna i yoh i la leh.
Kyntu u ya ki khynnah wym toh u chah yahbakla i stat wa da yoh ki ha kiwi tawon ki bor, tangwa u lai chakhmat yow poi ha ki kyrdan wa rap cha khlieh deiwa yooluti leh u man kiwa embynta hei wow tei ya ka mynried ka imlang sahlang.
Neitæ u chim ki leh ya ka nongmuna kiwi won ki waheh wasian ka chnong wa hanla wan ki na ka yung wa dooh wa duk leh katni dapoi ki cha i kyrdan i naam wa hakhlieh.
Hawa yaroh leh yei kaamram kiwa sikai kiwa da kreh chitomlang yow ku kani ka skur, kyntu u ya ki leh yow man kiwa ye u sneiñ kyntu ya ki khynnah skur lyngba i rukom man wa bha wa miat yong ki.
Neiliang u Lakhon Dkhar hawa klam pynsñiaw u i sñiawngooh ya waroh kiwa sikai yong oo kiwa da sikai da yarap ya oo nadooh i por wa lai Class khian hadooh wow poi u ha kani ka thong, neitæ da sñiawngooh u ya ka bei kiwa ha-yung ha-sem haroh yong oo kamjooh ya u Blai.
Ong u wym ye u su kylliang de ya waroh kiwa da embynta u yarap kyrchaan ya oo.
Hawa klam sneiñ ya ki para khynnah skur, kyntu u ya ki yow lehbha ki hei khreh kot katwa ye wa lah, khamtam heiyatoh wa i pynkhreh ya ka MBOSE Exam deiwa yooluti u wa ki leh u jop u poi ki ha ka thong wa da mang.
Hawa pynkynmoo yei emkaam u man kiwa em burom em akor, kiwa man biang por, kreh chitom, wei leh tikna yei kaamram, pynkut u deiwa ong, “Leh iwa bha tam hei im, heiwa daw yoh leh ya ka nong kylliang”.
Chwa ini neiliang ka Headmistress ka skur, ka Juliana Ryngkhlem pyntip ko wa ha u snem 2017 wa yakhun Exam SSLC nyngkong kani ka skur, da yoh ko 100% ka Pass Percentage, ha u 2018 leh 100%.
Neitæ ha u snem 2019 won da yoh ki 86%, ha u 2020 won 75%, ha u 2021 90%, ha u 2022 40%, ha u 2023 100%, ha u 2024 78%, ha u 2025 100% wei ha uni u snem 2026 won 75%.
Deiwa ong ko leh ha uni u snem da man u snem wa kmen tam neibhah wa haka lyngkhooh dap 10 snem ka skur, mih sa iwi i kmen ya ka skur lyngba ka Result SSLC u Lakhon Dkhar.
Neiliang ka dorbar chnong ha kani ka sngi da pynkup burom haroh ko ya waroh kiwa sikai skur kam ka dak i burom i sñiawngooh yei chakri yong ki.
Discussion about this post