U Montri Rangbah ka jylla da ong u wa ka sorkar da yakhun ko na waroh ki liang wow yada nei wan psiah pyrchah ya ka aiñ da ki bru kiwa na baar, hanla ka jylla hadooh katni ym pu yoh ko yaka Inner Line Permit (ILP) kawa da mynjur da ka yung dorbar chna aiñ wei hadien wa ini wa dep da chah pynuiñ ka Meghalaya Residents Safety & Security (Amendment) Bill, 2019.
Hawa klam wa ki laad pathai khubor da ong u wa ymtoh wa ka sorkar wym em leh ko iyi iyi wow yada nei wan buhai chnong kiwa na baar, wei da chim ki leh boon ki laad ki luti deiwa booh ya ki Infiltration Check Gate, i lai kynreh da ki chnat kiwa toh u pait ya ki bru wa psiah pyrchah yaka aiñ wei da phah liwan ki chei thaw wa wan ki.
Hajrong ka ILP waka MRSSA kiwa man ki aiñ wow pait bniah ya uwi pa uwi uwa psiah cha ka jylla, da ong u wa da em i dawa wa joor na ki paidbah ka jylla wow pynkrehkaam ya ka ILP heiwa ka sorkar ka da wanrah ko ya ka Resolution hapoh ka yung dorbar ya kawa da phah cha ka sorkar India, tangwa hadooh katni ka sorkar ym pu e dak iyi iyi hanla da kyrpaad da boonsien wei hadooh katni ka sorkar dang kyntu wei booddien ko ya kani ka kaam.
U Conrad da ong u leh wa ka MRSSA kawa man sa kawi ka luti wa ya sariem ya ka ILP, ym em yoh ko yaka muhor na u Lat, tangwa da phah cha ka sorkar pyrdi kawa da pynuiñ ya kani ka Bill deiwa phah wow pyrkhat wei pynbait thymme biang neibhah em ki kyndon ki wym yahaap.
Da ong u wa hajrong ini i chah pynuiñ, ka sorkar da bichaar biang ko ya katai ka Bill deiwa yaklam wa kitu kiwa emkti lang kamjooh wa ki bru wa tip aiñ wa kynthup ya u Advocate General yow pyrkhat kammon u lai chakhmat.
Discussion about this post