Uwi u Professor ka Bihar University da chah takit u ha ki pulit yei dawa u wow yoh da ka ri neibynta ki Muslim hapoh India kiwa da thoh u ha Facebook.
Uni u Professor toh uwa tip kam u Khursheed Alam wei ini i dawa yong oo da wanrah ko yei pyrchah da kiwa lai puræ kiwa da dawa wow ieh noh u yei kaam yong oo.
U Kursheed Alam toh uwa man kam u Assistant Professor ka Jai Prakash University heiwa ha iwi i Facebook Post da thoh u “United Pakistan and Bangladesh #Zindabad” wei heiwa da thoh u wa ki Muslim ka India kwah ki ka yong ki hi ka ri kiwa yajan waka Pakistan wa Bangladesh wei yeini da thoh u ha kini ki sngi wa dep.
Kiwa lai puræ kani ka skurbah da ong ki wa ini iwa thoh u toh iwa bakla wei da yoo lakam wym em de biang i rukom pyrkhat u wei da man u leh kam uwa pyrchah ri heiwa u Registrar ka University da toh u cha ki bor District wa cha u Lat.
Hadien ini, uni u Professor da ieh noh u yei kaam yong oo neidaw wa joor chah pyndik u ha ki bru wa pyrchah yeini wa thoh u wei da paan maap u leh lada ktah i sñiaw yong ki deiwa thoh u.
Ki pulit hawa takit yeini da ong ki wa uni u Professor da pynsñiaw donhi u yeiwa sñiaw yong oo samen.
Uni u Professor da pynksan u yeiwa ong u deiwa ong wa em u ka hok wa da e hapoh ka Constitution ka ri India kawa da ong leh wa ka ri ymtoh kawa leh chiliang næ kawa yachah ya kawon kawon ka niam tangwa ka BJP ha ki kular Election yong ka da kwah ko wow pynman yaka India kam ka “Hindu Rashtra”. Wei katni hapoh ka ri ym em de man ko iwa laitlooid ya kiwi ki ri hadooh ki yung bichaar leh manda pynmih hukum da man bait da kiwa pyrchah ya ki Muslim kiwa man kam kiwa khian paaid.
U Alam man u kam u Head of Department ka Political Science ha Narayan College, Siwan kawa em hapoh ka JP University.
Discussion about this post