Ka sorkar Odisha da hap ko wow khang yei pynemkaam ya ki rynsan Social Media hadooh i pyrdi sngi ka 10 tarik uni u bnai wa kynthup nadooh ka WhatsApp, Facebook wa kiwi de ha ka Malkangiri District hadien wa mih i kynaad hapyrdi ki ar jaitbru deiwa chem yei metyap kawi ka kynthai wa chah khrai khlieh hadooh wym yohsa ki bor sorkar leh yeiwa leh ki.
I chem yei metyap kani ka kynthai da wanrah i ya ki paidbah wow mih lai tympra, u thang ya ki yung ki sem hapoh ka District heiwa ki yung ki sem wa chah ktah da em ki 163 tylli wei da phah ya ki bor ka aiñ yow wanrah yei suk i saaiñ.
Neiliang ki bor District da hap ki wow khut yaklam ya waroh arliang wei da ong ki kattæ i long i man toh iwa da jai-jai.
Ki bor District da e yarap poisa ki Rs 30,000 cha u khon kawa yap, katwa u Chief Minister won da e yarap u Rs. 4 lak.
Yei metyap da chem ha ka 4 tarik uni u bnai ha ka wah Poteru heiwa da thooh leh yei khlieh iwa da chem 15 Km nei thaw wa chem yei metyap ko harood kani hi ka wah iwa hajan ka Kanya Ashram. Kani ka bru da wiar ko nadooh ka 1 tarik uni u bnai wei hadien wa chem yei metyap yei khlieh ko da chem ha ka 8 tarik.
Ki pulit da kem ki ya uwi u bru wa tip kam u Subha Ranjan Mandal (42 snem) heiyatoh wa ini wa jia.
Da em leh kamwa 300 ngut kiwa da hap wow yut chnong heiwa neiliang ki bor District da pynkhreh ki yei thaw sah, i thaw baam deilang ki kymmor ya ki.
Kani ka kynthai wa chah pynyap toh kawa 51 snem i rta wei man ko leh kam ka Tribal.
Discussion about this post