Ynne i step ka 26 tarik ha Iawmusiang, Jowai nadooh 7 waje i step da em kiwa chong dai cha rood sarok wei em leh ki dukan dai khoo kiwa wai hadooh kiwa dai kbær hanlada ka Curfew ka sorkar jylla krehkaam ko ynne ka sngi wei kamjooh ka Lockdown wa pynbna da u Modi.
Nadooh ynnin ka sngi da em i yaklam ki bru wa daw wai yaw kattu katni kynta ha Jowai hanla ki bor District ym em pynbna ki yeini wei ye u man leh wa em ki bru wa dang kynmoo bait ki yaka hukum warim wa daw wai yaw ynne ka 26 tarik hanla ya kani da pyndam hadien wa pynbna Lockdown u Modi wei da pynkrehkaam sa yaka Curfew.
Ki bru wa mih wow lai thied mar leh man ki kiwa boon wei kiwa yoh da yoh ki hadooh u thied yow khoo leh kamjooh.
Iwa yoo phylla wa ki pulit wa yang cha Iawmusiang ym em khang ki ya ini nadooh wa sdang wei manda kieh kamwa 9 waje da sdang ki wow beh bru wei wow phah khang dukan wei da wan leh ka kari DIPR wow pynbna phah liwan yaki paidbah.
Kam wow pynkynmoo wa ka sorkar jylla ynnin, hadien ka Cabinet Meeting da pynbna ko wa nadooh ka 27 tarik u chah u wai ki dukan dai khoo (Grocery Store) tangwa i rukom wai wa i por toh u rai da ki jar jiar ki DC.
Neiliang ka Dorbar Chnong Tympang Iawmusiang, Jowai da kyntu ko ya waroh kiwa chong chnong, kiwa chong dukan hapoh u pood u ang yong ka wow man ki kiwa ia ksohktilang wa ki bor ka aiñ, khamtam heini i por wa da pynkrehkaam ya ka Curfew heiwa ym chah ya ki bru u ya mih ki cha sarok næ u wai ya ki dukan dukdoh yong ki kawa man pyrchah ya i pynbna da ka sorkar pyrdi wa ka sorkar jylla yong i. Kamtæ lada chem ya kiwon kiwon kiwa yaleh pyrchah khamtam ki dukan neiliang ka chnong daw chim ko da ki luti wa eh u pynchitom ya ki.
Sa chisien da kyntu ya ki paidbah wow ya snohktilang lang wa ki bor sorkar kamjooh leh wa ki bor chnong yow man ki bru kiwa kohngooh ya ka aiñ.
Da kyrpaad leh ya ki bru na kiwi ki dong kiwa ym emkaam wow sñiawbha ham wan hi heh cha Iawmusiang.
Discussion about this post