Ka Union Health Ministry da ong ko wa da chem wa kiwa boon ki jylla kiwa heh, wa ya kitu kiwa em chitom namo kiwa man Symptomatic tangwa manda Test da ka Rapid Antigen Tests (RAT) da chem wa ym em yoh ki ya u COVID-19, ym em pyn booddien won sa daka RT-PCT Test yow pyntikna wa ym em yoh ki ya uni u khñiang.
Da ong wa ki kyndon ka ICMR kamjooh ka Union Health Ministry da klam che ko wa emkaam wow leh yaka RT-PCR Test hadien wa leh yaka Rapid Antigen Test ya waroh kitu kiwa em ki dak ki chin wa chitom kam kiwa iñdoh, kiwa em ka’oh wa kiwa chem chitom wow riñ mynsien hanlada ka RAT pynyoo ko wa ym em yoh ki ya u COVID-19.
Kamjooh ya kitu kiwa ym em ki dak ki chin wa chitom ki tangwa hadien 2-3 sngi sdang ki wow yoh ki dak ki chin, hap wow Test ki daka RT-PCR yow pyntikna.
Hajrong ini, ka Union Health Ministry deilang waka ICMR da thoh ki cha waroh ki jylla yow pyntikna waroh kiwa em yei chitom tangwa manda Test daka RAT man Negative ki namo ym em chah ktah ki wa hap wow leh won saka RT-PCR Test yow pyntikna wa ym em bakla ka Test.
Da ong wa ini daw pyntikna wa ym poor u khñiang kamjooh yow chem smat ya kiwa yoh ya uni u khñiang deiwa ong leh wa yaka RAT da leh yow ye u Test ya kiwa boon ki bru tangwa kawa chniah dooh wei kawa tikna dooh ka Test toh deiwa leh daka RT-PCR.
