Hawa yaklam wa kiwa pathai khubor ynne ka sngi, u montri ka chnat i chait i khiah ka jylla, u AL Hek hei emlang ki Doctor, da pynche u wa i poor ha ki Social Media wa em uwa chitom na u khñiang Coronavirus ha NEIGRIHMS ymtoh iwa sakhiat wei ka sorkar da phah ko ya ki bor kani ka thaw sumaar wow pynchitom ya kiwa emkti wow pynpoor ya kani ka khubor hamsaya.
Neiliang ka Dr. M Marbaniang na ka State Surveillance Officer, da pyntip ko wa da sylli (Screen) ya ki 62 ngut ki bru wa wan na baar ri wei da chem wa ym em ki ya uni u khñiang heiwa da booh ya i thaw sylli ha UmroiAirport kamjooh leh wa ha Dalu wa ha Dawki.
Katwa u Dr. A. War, da ong u wa ki dukan dai dawai, ymtoh u dai palat dor ki ya ki tiar tymmoh khmat (Mask) kam ha kini ki por.
Da kyntu u leh ya ki paidbah wow dam ki u chah pyntieñ wei wow man ki kiwa lehkhooid deiwa sait bha ya ki kti man ki por, wei wo bood ya ki kyndon ka sorkar.
Chooh chooh ki bor pynlai ka NEIGRIHMS ynne da pyntip ki wa u bru wa chah sumaar toh uwa chitom hei riñ mynsien wei ym em iwon iwon iwa yatoh wa uni u khñiang.
Chooh chooh da pyntip wa ya ka Test yong oo da phah cha Kolkata.
U Director ka NEIGRIHMS, u Dr. DM Thappa da ong u wa ym em iwon iwon wa ye u pynsakhiat wa toh i kjut na uni u khñiang (wa yoh uni u bru) wei da wanrah ya oo cha NEIGRIHMS na kiwi ki thaw sumaar samen wa em ha ka nongbah Shillong.
Chooh chooh neiliang u Superintendent ka NEIGRIHMS, u Dr. Noor Topno da ong u wa uni u bru chitom u wow riñ mynsien weiwa katni da sdang chait tangwa hanla kattæ leh da phah wow pyntikna ya ka test cha Kolkata khnang wow leh yeiwa emkaam.
Da pyntip u leh wa ha NEIGRIHMS ki tiar u Test ya uni u khñiang u poi ki ynne ka sngi.
Discussion about this post