Hadien wa ka North East Petroleum Mazdoor Union da pynbna ko wow sangeh yei pynpoi phñiang Petrol wa Diesel, neiliang ka sorkar ynne ka sngi da yaklam biang ko wa kiwa yahkhmat kani ka Union haka yalang wa da pynman ha Nongpoh, Ri-Bhoi wei ha kani ka yalang ka sorkar da pyn-eh bait ko yei dawa ka Union hajrong ki kaam wa da chim da ki pulit wow kem ya ki bru kiwa emkti yow khayi tooh yei phñiang na ki kari Tanker ha NH-6, Ri-Bhoi.
Kam wow pynkynmoo wa kani ka Union da dawa ko wow pynlait ya ki dkhot yong ka kiwa chah kem ha ki pulit kiwa da chah pynbaad wa emkti wow tooh phñiang napoh ki kari kiwa lai kit phñiang cha ki Petrol Pump wa em hapoh ka jylla lym kamtæ u dam ki u wan kit phñiang chapoh Meghalaya.
Kani ka yalang wa da pynman ynne toh ka sien wa ar waka NEPMU, wei neiliang ka jylla da mihkhmat da u Additional Deputy Commissioner ka East Khasi Hills, Peter Passah, u Additional Deputy Commissioner ka Ri-Bhoi, u MB Tongper deiwa emlang leh u President ka Petroleum Association of Meghalaya, u Kennedy Khyriem wa kiwa pynlai yong ki Company pynmih phñiang.
Hawa klam wa kiwa thoh khubor hadien ka yalang, u Peter Passah da pyntip u wa ha kani ka yalang da yoh wow yatai sani bha hajrong i dawa yong ka Mazdoor Union yow e jamin noh ya ki dkhot yong ki na ki thanat pulit ka Meghalaya, wei neiliang ka sorkar da pynche wa ini ymtoh iwa embor da ka sorkar wow leh neibhah da em ini i kaam hapoh i bichaar ka yung bichaar kawa daw leh yeiwa emkaam khnang yow chem yeiwa sakhiat.
Da ong u leh wa neidaw wa em i khayi tooh yei phñiang ha u NH-6, ka aiñ hi daw leh ko yei kaam yong ka wei ka sorkar ym tuklar ko yeini.
Kamtæ hadien wa da ya phyllu sani bha, neiliang ka NEPMU da rai ko wow pyndam chipor yei rai wow sangeh pynpoi phñiang chapoh Meghalaya wei neiliang kiwa yahkhmat ka Union da pynsñiaw ki wa da hun ki yeiwa mih na kani ka yalang wei pyn myntu hi daw phah noh ki ya ki kari kit phñiang wow lai biang cha Meghalaya.
Discussion about this post