U General Secretary ka United Democratic Party (UDP), u Jemino Mawthoh da pynsñiaw u yei khyrngiat wa khroo wow yoo ya ka ‘Notification’ namo i pynbna wa da pynmih da ka sorkar wow khang u chimbynta kiwa sikai ha ki kaam seiñ saiñ pyrthai.
Da ong u wa katkam i pynbna ym man kawa che pura namo kawa biang wei da pynsñiaw u wa ka sorkar toh u pait wei bichaar bniah sa chisien khnang wow wanrah won da ka pynbna wa paka, ka wym ktah.
U Jemino uwa man leh uwi uwa sikai uwa da psiah cha ka kaam seiñ pyrthai da ong u wa kamwa man katni, hapoh ka jylla da em boon jait kiwa sikai wa da phiah ha ki bynta waphær waphær wei ye leh wow kdaw hajrong i yaklam ya ki skurbah ha kylleiñ ka ri, heiwa daw chem wa ki da em boon kiwa sikai ha ki por wa da lai, kam u Manmohan Singh, u Murli Manohar Joshi, lane u MP wa katni ka Rajya Sabha u Rakesh Sinha uwa na Delhi University wa kiwi kiwi kiwa da psiah cha ka kaam saiñ pyrthai wot hawa dang man ki kam kiwa sikai, tangwa kamwa man katni won, i em yong kiwa sikai wow psiah cha ka saiñ pyrthai da sdang wow duna bha.
Ha i jooh i por, u Jemino da ong u wa kiwa sikai toh kiwa da chah ktah hadooh kattæ kattæ neibhah wot hapyrdi i e chakri kawa janai wow pynwan dur ya ka mynried yong ki khynnah, tangwa iwa jia hapoh Meghalaya, da man sakhiat iwa sñiawsih wow yoo, neibhah wot hapyrdi i e yarap wa khroo wow kyntu ya ka jylla wa ka imlang sahlang ha ka liang ka puræ puthi tangwa da chah ktah wei chah khñioñ beiñ wei katni hawa pynmih ya kani ka pynbna da nang chah ban beiñ wei chah kyntait.
Uwa yahkhmat ka UDP da kyrpaad u ya ka sorkar wow chimkhia wei wow thooh ki laad ki luti wow pyndooh yei eh wa boon kiwa sikai kiwa da dep wow yachem khamtam ya u Montri Rangbah uwa ksoh leh ya ka chnat Muna Tyngka wow chimkhia u pynlait noh ya ka tulop ka yong ki khamtam ha kani ka por wa ki paidbah ka pyrthai da lehkmen ki ya ka aiom Christmas.
