U MDC ka Congress na Rambrai-Jyrngam u Bajop Pyngrope da pynsñiaw u yei lyngngoh hajrong i mih khubor wa e chithi ki chnong Garo cha u Montri Rangbah ka Assam, u Himanta Biswa Sarma wow pynsñiaw wa kwah ki wow em cha Assam hadien i pynbait pood.
Hawa klam wa kiwa thoh khubor, u Bajop da ong wa man sakhiat iwa lyngngoh wa kiyi kitæ ki bru wa e yei thoh neibhah katkam wa tip deiwa pura, waroh kiwa yahkhmat chnong Garo kiwa em ha khappood da dep ki wow pynsñiaw yei kwah yong ki wow em ha Meghalaya ha ki yalang yong ki Regional Committee kiwa da dep chong ha ki kajiak tayaw wa da lai.
Da ong u wa ha ka yalang yong katai ka Committee, ki chnong Garo waroh da rai ki yong chnong wow em cha Meghalaya, kamtæ ka khubor wa mih ha ki laad pathai khubor ha Assam wa ki chnong Garo kwah ki wow em cha Assam, daw hap wow pait wei bichaar bniah wa kiyi kitæ kiwa e chithi wei kiyi kiwa da soi.
Choooh chooh uni u MDC ka Rambrai da ong u wa ye u man i leh buit tooh yong ka Assam wa ka da sñiawthooh wa ki Garo kwah ki wow em cha Meghalaya, kopsar da em kiwa khwan myntoi samen kiwa kwah wow man Agent yong ka Assam, neibhah da yoo wa ki chnong Garo ha ki Regional Committee da kwah ki wow em cha Meghalaya, kamtæ ym ye wow ong wa em wa thoh chithi wa kwah ki wow em cha Assam.
Da pynsñiaw u leh wa dang ha ka yalang wa da khut da u Montri Rangbah kawa da man ha ka 15 tarik uni u bnai, hadooh kamwa 90% kiwa wan yalang da pynyoo wa ki kwah ki wow em cha Meghalaya.
Hawa kylli, da ong u wa katkam ka Electoral Roll waroh ki chnong kiwa thap Vote cha Meghalaya da pynsñiaw ki wa ki kwah ki wow em bait cha Meghalaya, da pynrap u leh wa em won ki chnong kiwa da chah pyndam nachwa na ka Electoral Roll kiwa kwah wow lai yabi noh cha Assam, wei lada ym mon ki, ym ye wow pynbor.
