Ka seiñ Federation of Khasi Jaiñtia & Garo People (FKJGP) War-Jaiñtia Circle kam chibynta wow booddien yeiwa da ujor wa da booh ha ka 5 tarik uni u bnai hajrong i sih u sarok nadooh na Nongtalang cha Dawki uwa da sih hadien 3 bnai wa chna ya oo, da lai yachem biang wa u Executive Engineer ka PWD Jowai Central Division ha kamra kreh u ha ka 12 tarik uni u bnai yow pynkynmoo.
Ka seiñ da dawa ko wow pynchna noh smat ya uni u sarok nadooh Nongtalang cha Dawki neidaw wa da sih lut u wei uwa da dep lut dei thlu uwa da dep leh wow lai pait dei khmat yow pynsakhiat yeini iwa da booh hei eh ya kiwa boon ki paidbah wa lai wa wan neidaw wa da kaad da pra lut u sarok khamtam ya kiwa sah ha thaaiñ War Jaiñtia kamjooh kiwa khayi pateiñ.
Hei yachem wa u EE, da kular u wow chna pynmiat biang deiwa pyndap chwa du ya ki thlu ya katni chooh neidaw wa joor u slap ympu ye wow leh iyi iyi yow pynchna ya kiwa boon kiwi ki bynta wa sih tangwa mar ya rang daw sdang biang yei kreh.
Hanla kamtæ leh, ka seiñ da ban joor ko wow booddien wei lada ym leh kamwa da dawa neiliang ka seiñ daw leh ko yeiwa emkaam.
Heijooh i por ka seiñ da pynkynmoo ya ki kaam wa sahteiñ kam ki Speed Breaker ha Ladjaplem, heiwa neiliang u EE da kular u wa ha kini ki kajiak sngi daw pynchna manda rang i bneiñ.
Ha ini i yachem wa u EE da emlang u President ka FKJGP War Jaiñtia Circle, u B. Mukhim, u General Secretary, u Kynsai M Khonglah wa u General Secretary FKJGP West Jaiñtia Hills District, u Marhok Myrboh.
Discussion about this post