U Symbood Montri Rangbah ka jylla wa pait leh ya ka chnat Urban Affairs, u Sniawbhalang Dhar da khana u wa ka chnat da phah ko yei thoh cha ka Harijan Panchayat Committee (HPC) wow jubab noh ya ka sorkar hawa yatoh wa i pynwandur lane ‘Blueprint’ yong ki thaw sah wa da pynkhreh da ka sorkar neibynta wow kyrriah noh ya ki bru kiwa sah ha Them Metor, Them Ïewmawlong.
U Sniawbhalang ynnin ka sngi da khut u ya ka yalang wow ya pyrkhat ya phyllu yumut sani hajrong ki kreh kiwa dang pynkrehkaam hapoh ka sor Shillong, wei ha kani ka yalang da yaklam bniah bha leh ya i kaam wow kyrriah ya ki 342 tylli ki manyung na Them Metor.
Hawa klam wa kiwa thoh khubor ynne ka sngi, u Sniawbhalang da khana u wa neiliang ka HPC da paan por ko kamwa 3 bnai wow e jubab ya ka sorkar, tangwa neiliang ka chnat da phah ko dei thoh ynnin hi ka sngi wa hap ki wow e yei jubab noh hapoh yong 10 tarik u April, 2023.
U Sniawbhalang da ong u wa da toh i por wow pyndep noh ya ini i kaam wei ka chnat daw yang ko yei jubab yong ka HPC hadooh ka 10 tarik, heiwa da ong u wa hadien wa da yoh yei jubab, ka sorkar lyngba ka High Level Committee daw pyrkhat ko kammon u leh.
