Jowai: Ynne ka sngi u Montri ka sorkar pyrdi uwa pait ya ka tnat Ministry of Coal wa ya ka Railways u Piyush Goyal hawa wan yalap Election u ha 8 Mer neibynta ki 7 kyrtong ka party BJP na ri-loom Jaiñtia da ong u wa manda kut ka samoi tlang (Wisu) daw wanrah ya ka sorkar BJP hapoh ka jylla.
“Ka Meghalaya man ko ka Paradise tangwa ha kini ki khatsan snem, ka poisa wa wan na ka sorkar pyrdi ym ye u pynemkaam ya ka neibynta ki paidbah,” da ong u Goyal.
Da kylli u leh wa lada em u Montri Rangbahdooh ka ri ha kini ki 70 snem wa da wan yoohkjat ha ka jylla boonsien bar ya u Modi, neibhah wa oo maya bha u ya ka jylla wa ka thaiñ mihsngi.
Heijooh i por da ong u wada toh i por wow pynmiat ya ki sarok wa ki Airport wow suk wow wan cha kani ka jylla kam chibynta wow kyntu kynrong ya ka kaam uiñke suwari.
Da ong u wa ka dustur riti yong ka jylla kawa man kyrpang toh da emkaam wa waroh kawi ka pyrthai toh u tip ki ya ka toh u tipmit ha waroh kawi ka India.
Heiyatoh wa i chait i khiah da ong u wa da sdang ya ka Ayushman Bharat heiwa da mang T. 10,000 Klur heiwa kawi pa kawi ka manyung toh u yoh ki T. 5 lak wow yoh ki i sumaar wa mynkna wei manda poi ka sorkar ka BJP hapoh ka jylla daw yoh ya ka laad sumaar kawa miat kawa pura.
Da klam u leh chaphang ka Skill Development khnang wow yoh myntoi ki khynroo khyllood wow ye ki u yoh yei kamai kajih.
Hadooh 90,000 tylli ki kaam wa lait da em hapoh ka tnat Railways wei da kyrmen u wa waroh ki khon ka jylla da thap ki yeini i kreh neibhah emkaam wow pyndep du ya ka SSLC donhi.
Da pynkynmoo u leh wa ka sorkar u Modi da pynku ko ya ka mang poisa neibynta ka Meghalaya yeiwa da pynku na ka T. 5,800 klur chadooh ka T. 25,000 klur deiwa ong wa lada poi da ka sorkar Congress kani ka poisa ym poi ko cha ki paidbah.
Hei yatoh wa i chah khang mooyong la 3 snem kattu da ong u wa u Dr. Mukul da pyrchang u wow krehlang wow wai biang ya u mooyong tangwa ym em wa yarap næ kyrchaan yeini i thmu.
“Le snem nachwa da wan ki tre mooyong hei yatoh wa u mooyong tangwa da ktah i yei sñiaw O wow tip wa da ki lak wa chah ktah heini” da ong u Goyal.
Heijooh i por da ong u wa ymye u pynsih ya ka rymaw tangwa emkaam wow tih ha ki rukom wow yada leh ya ka rymaw.
Da ong u leh wa da khut u ya u Mukul wow wan yaklam hei yatoh wa ini tangwa oo won da phah u du da ki sahep ki wym embor yeini wei pynjoor u du wow thoh chithi khlem leh iwon iwon i kaam.
Da pynrap u deiwa ong wa daw booh ya ki laad wow tih mooyong heitæ i dur wow yada ya i chait i khiah kiwa em ha kani ka kaam wa ka rukom wow yada ya ka rymaw.
Da kular u leh wa lada poi ka BJP heibor, du hapoh 180 sngi u wai biang ya u mooyong khlem emkaam u pynbaam poisa, wei ym emkaam de u tieñ ya ki pulit hawa kit ya u mooyong.
Da ong u wa u Blai da kyrkhu u ya ki paidbah ka Meghalaya tangwa da em won kiwa da chim kabu wei kiwa yalam bakla ya ki.
Da ong u leh wa daw kreh ka BJP neibynta waroh deiwa e nongmuna wa heipor wa jop ka BJP ha Uttar Pradesh da kreh ko neibynta waroh khlem pait chilliangkhmat.
“Ong noh ya u Dr. Mukul wa ym ye de u wow thok ya i, wei da kut i por yong oo kattu” da pynkut u Goyal.
Kiwi kiwa da klam ha kani ka yalang toh u Sunil Deodhar uwa pait ya ka Tripura, u Nalin Kohli wa kiwi kiwi.
Discussion about this post