Ka nongbah New Delhi da man ko kawi na ki jylla kawa da chah ktah bha ha ka khlam COVID-19 ha kani ka sien wa ar wa wan biang ko heiwa da mih chiboon i emkaam nadooh ki Oxygen wa ki thaw sumaar heiwa ki bor sorkar ka New Delhi da yaleh ki katwa ye wow pyndap pynbiang yei emkaam ki paidbah kamjooh leh wow khang yei poor kani ka khlam COVID-19.
Neiliang u montri rangbah ka New Delhi, u Arvind Kejriwal ynnin ka sngi da ong u wa da dep chna ya ka thaw sumaar (Hospital) kawa em 500 tylli ki pyllong ICU ya kawa da chna hapoh 2 tayaw ha Ramlila Maidan mar pyrchah ka GTB Hospital.
Da ong u leh wa ya ki paidbah daw sdang pdiang noh nadooh ynne ka sngi deiwa ekhublei leh ya ki Engineer kiwa da chna ya ka du hapoh ini i por wa tbian.
Katkam ka yutip wa da yoh ya kani ka thaw sumaar daw pynman kam ka Corona Care Centre.
Neiliang u Satyendar Jain uwa man u montri ka chnat i chait i khiah wa ya ka PWD ka sorkar Delhi da ong u wa hapoh i yahkhmat u montri rangbah ka jylla, u Arvind Kejriwal da ye wow kreh ya kani ka thaw sumaar khlem sangeh wei hapoh i por iwa tbian bha.
Da ong u leh wa kani ka thaw daw pynyabi (Attach) ya ka wa ka GTB Hospital, wei daw ye ko leh wow sumaar ya ki bru wa chitom joor.
