Hadien wa jia i chah siatyap ki 26 ngut ki bru ha Pahalgam ka jylla Jammu and Kashmir ha ka 22 tarik, ynne ka Cabinet Committee on Security (CCS) ka sorkar India da chong yalang ko ha nongbah New Delhi.
Kajiak kam wow batai heini ka CCS toh ka Committee wa khlieh da u Montri Rangbah ka ri heiwa ki dkhot yong ka kynthup ki ya u Montri ki kaam yada ri, u Montri ki kaam pohyung, ka Montri ka muna tangka, u Montri ki kaam baar ri heiwa da jooh embynta lang ha ka yalang ka Committee wa uwa e buit hei yada ya ka ri namo u National Security Adviser, u Cabinet Secretary kamjooh wa u Defense Secretary.
Ynne i janmiet ka Cabinet Committee on Security (CCS) da chim ko ya ki rai wa khor bha, ki wow ktah joor ya ka Pakistan kamjooh leh ki wow krehkaam noh wut-wut wei kitæ kynthup ki ya kini ha wah:
1. Ka Indus Water Treaty yong u snem 1960, heiwa ym bood de ya ki kyndon kani ka soskular kat hadooh wym sangeh ka Pakistan ya ki kaam damok yong ka.
2. U khang noh ya ki Integrated Check Post ha Attari tangwa kitu kiwa da psiah chapoh India deiwa biang ki kot ki sla u chah u liwan ki chwa ka 01-05-25.
3. Waroh ki sahep chipai (Military Attaché) ka Pakistan wa kreh ha India u sangeh kreh ki.
4. Ka India u phah liwan ko ya ki sahep chipai wa em ha Pakistan.
5. Ki nong Pakistan u dooh noh ki wow u psiah cha India katkam ki kyndon ka SAARC Visa Exemption Scheme. Lada em kiwa da yoh ya kani ka VISA kiwa man kam ki Pakistani da kheiñ wa da pyndam ki wei kitu kiwa em hapoh India lyngba kani ka VISA hap ki wow liwan hapoh 48 kynta.
6. Ki sahep chipai ka Pakistan u mih ki na ka ri hapoh chi tayaaw.
7. Wow pynduna ya kiwa kreh ka India wa Pakistan High Commission cha ka 30 na ki 55 ngut nadooh ka 01-05-25.
Katkam ka khubor wa tikna, da ong wa ini man iwa dang sdang donhi wei sam chaphrang ka sorkar India daw pynkhor ko ya ka Pakistan.
Discussion about this post