U Symbood Montri Rangbah uwa pait leh ya ka chnat District Council Affairs (DCA), u Prestone Tynsong da ong u wa i pynkhreh ya ka Election MDC yong ki ar tylli ki ADC da lai ko chakhmat wei heijooh i por da pynche u wa i daw wa pynslem biang yei pynman Election sa 6 bnai toh neidaw wym ye u pyndep yei pynkhreh du hapoh kajiak por.
Da ong u wa i pynyinsur sa 6 bnai ya ka samoi yong ka KHADC wa JHADC daw kut ko ha ka 5 tarik u Wisu (Mar) 2025, wei chwa ini i por hap wow pyndep noh ya ka Election.
Da ong u leh wa ini i pynjrong ya ka samoi krehkaam yong ki ADC da leh katkam ka aiñ wa da e bor hapoh ka riti synchaar, wei i pynyinsur toh iwa ye u leh du hadooh 12 bnai donhi, wei lada hapoh ka 12 bnai ym ye wow pynman Election, daw wan noh ka synchaar Administrator ha ki ADC.
U Prestone da ong u wa hadien wa da pynbait ya ki Constituency da hap wow pynbait leh ya ki Electoral Roll, wei ki District Council hap ki wow pynpsiah leh ya ki Constituency thymme hapoh ka AD Rules wei da em leh kiwi de kiwa hap wow leh kam yow wanrah ya ki kor EVM ya kiwa da paan na ka chnat Election ka ri wei daw chimpor la kammon kammon palat 3 bnai chiteiñ.
Heijooh i por u Prestone da kyntait yei chah pynbaad wa pynslem ya ka Election toh neidaw wa tieñ ya rem, heiwa da ong u leh wa ha ka Election chong ha ki kyrtong wa rai ki paidbah.
Discussion about this post