U kyrtong ka UDP na 2-Jowai Constituency, u Moonlight Pariat hawa wan chimbynta ha ka rynsan yalap Election yong waroh ki kyrtong wa tip kam ka Common Platform Election Campaign wa da pynman da ka Dorbar Chnong Khimusniang, Jowai ha ka 9 tarik heiwa da emlang leh u kyrtong ka TMC u Awhai Andrew Shullai, u kyrtong ka NPP u Wailadmiki Shylla, u kytrong ka BJP u Allan K Suchiang wa u kyrtong ka Congress u Daniel Dan da ong u wa emkaam ya uwa mihkhmat uwa ye u pynskem, uwa ye wow ksoh, uwa ye u pait u yoo ka ka Constituency khnang wow ku hei roi i paar, ka kamai kajih ha ki liang waroh.
Da ong u wa ka UDP da booh ko wow pait deiwi ya ka Reservation Policy kam ka kular Election ha ka Manifesto neibhah deiwa em ka Roster System da dooh kyrmen ki khynroo khyllood ki Khasi Jaiñtia da palat neidaw wa lai chiliang cha kiwi.
Sa kawi ka thong toh yow pynyoh kreh yow lait u lut i por ki khon khynroo khyllood yong i khamtam ki kynthai wow chong ha tre tpai wow chet wow tu wei da jia ini neidaw ka sorkar Meghalaya ym bien ko wow pait yeiwa emkaam yong ki.
Da ong u wa ka NPP hawa wan yalap Election ko ha Jowai, neiliang u National President yong ka, u Conrad K Sangma da kular u 5 lak tylli ki kreh, tangwa neiliang u Moonlight da ong u wa ym toh de i por wow chah pynbiej toh u jied dei stat ya sepai ka mynried ki khon ki kti.
Da ong u leh wa lyngba ka RTI kawa da em wa yaleh ha u 2022 da chem wa em 8,000 tylli ki kreh wa dang lait ki wym em wym nood ki u khut kreh, u Advertise tangwa da wan ki wow kular 5 lak tylli ki kreh iwa ym ye u man.
Da khana u i daw wym nood ki u khut kreh toh neidaw ka yarong poisa ka jylla Meghalaya da jæd ko la phrai wei ka UDP u syrdep ko ya ini wa lait tooh ka poisa wa toh u pynlang ka sorkar yow ye u khut kreh khut khih.
Kamtæ da ong u wa ham biej ya katæ ka 5 lak tylli, toh u pait chwa ya iwa da em kiwa da ye u poi hadooh 10,000 tylli ki kreh wa dang lait, toh u ya ang chwa i ya kini yow lait u sepai ki lak wa da pynlut u pynlai skur pynlai puræ ya ki khon yong phi yow yoh kreh katkam ka kyrdan wa lai puræ ki.
Da ong u leh wa ya ka Iawmusiang toh pyndep u chna yow suk kiwa chong yaaw wow yoh thaw da kawa ye u khang hei miet, yow lait nei iñ yow yoh ki u thiah dei suk hei miet yow yoh kreh leh ki khon khynroo ha kani ka yaaw kattu katni tylli tangwa sñiawsih wym em wa ye u pyndep ka kawa da kreh chitom u wanrah wei ka poisa dang sah sa ar bhah kawa mar T. 6.33 klur kawa ym em wa tip u li thooh wei oo lada yoh laad u daw thooh u kiwi won ki Scheme yow pyndep ya ka.
Ya kiwa chong chong ka Jowai da ong u wa chem chitom ki manda sahkut ha Jowai ha New Hill, ha Ladthadlaboh wa ha Mihmyntdu wei ya ini i eh ym em wa bien u pait ym em wa bien u yoo.
Heiyatoh wa ka Civil Hospital da ong u wa manda dep ki Doctor wow pait, ki bru dang hap ki wow lai cha Pharmacy yow lai thied dawai ileh wym ye u pynbiang dawai hapoh ka Hospital.
“U lai phah Test ha ki thaw sumaar ki bru samen wot ya iwa khian dooh leh ym duna ya T. 2000, pyrkhat ya kiwa dooh wa duk,” da ong u Moonlight deiwa pynrap neiwon u klah hawa ym em tang i kaam leh.
Da ong u leh wa da yaleh MLA u kattu la soo sien neidaw wa emkaam ya uwa mihkhmat uwa ye u pynskem neibhah waroh iwa em ha Jowai da tdeh da kynjroi lut nadooh ka PWD North Division da rah na Jowai cha Shangpung deiwa pynkynmoo wa u MLA wa katni da ong u wa lada rah ya kani, da ka thma leh ym swe u wow yaleh, “Ym tip O heiwon yaleh thma u, daw hap jubab u,” da ong u Moonlight .
Da kdaw u leh wa em boon ki khian ki chnat sorkar da dep rah kam ka Horticulture kawa da dep rah cha Thadlaskein, kawa jooh em hajan ka skur Mazzarello, da rah ya ka yung krehkaam ICDS kawa toh neibynta u e baam khynnah kawa jooh em hajan CS Office da rah katni mar pyrchah ka ATS, ka chnat Labour kawa em ha Ladthadlaboh da dep chna ha ITI Khliehtyrchi su kyrriah donhi. Ka KVY yong ka sorkar pyrdi da dep rah cha Wahiajer, ka Dairy Plant kawa em ha Jowai da chna katni hajan JNV Mukhla. Chooh chooh da ong u wa ya ka Electrical Division ka PHE leh da em i yaklam wow rah cha Shangpung wei daw hap lai su bai um chadooh cheitai.
Kamtæ da ong u wa lada ym toh wa em ka Election, ka yung krehkaam u DC leh da dep rah wei chi lai kani ka Treasury leh da lai, ki Bank leh waroh da hær wei kini toh i angnood ka sorkar wow pynkylla ya ka chnong Jowai nei sor cha ka nongkyndong wei wow rah leh ya ka District Headquarter cheiwi boi heitæ i por tang ka Block leh ym yoh de.
“Lada bakla jied ya uwa mihkhmat, ka mynried yong ki khon ki kti yong i da kut syndon ko,” da ong u Moonlight.
Da ong u ham chah pynbiej ha ka T. 10,000 wa da pynhær ha Jowai katni kawa neh du chi bnai katwa ki 4 snem 11 bnai cheiwon u khmied phi cheiwon u ang phi, “Emkaam i ya ka roi ka paar, u kset yei liat ka poisa yow ye u kyntu kynrong biang ya ka khih ka kamai yow man salonsar ym toh u em ka High Level ka Low Level”, da ban joor u Moonlight.
Da kdaw u leh yei dooh tulop ki wakreh ka Municipal waka JHADC da 14-15 bnai deiwa kylli iyi krum kiwa mihkhmat yong i kiwa muja wow dai mooyong chi miet chi miet katwa ki bru chah thngan ki.
“Nga tip O kammon wow leh yow yoh yei bhah 25% ki mar pohkhyndaw, ka bhah na ki dieñ ki praw, nga wow pynbiang,” da kular u Moonlight deiwa pynrap wa heipor yong oo kam u CEM ym jooh em dooh tulop katwa manda poi da kiwi tæ dooh tulop.
Kamtæ da kyntu u wow man kiwa sien wei ym toh u chah pynbiej ha kitu kiwa rah muna chi miet chi miet kiwa da uiñ kylleiñ ka Jowai.
Da kylli u leh ynnu hei parom ka chong Jowai wa da sma da tung hawa waroh ki kdong ki kiar, ki wah, ki luti ki syngkieñ da dap sa du i jhep? “Da jia kamni neidaw wa kiwa mihkhmat ym yoh por ki wow pait yeini,” da pynbaad u Moonlight.
“Hapoh 6 bnai nga u pyndep biang O ya ka thaw noh jhep hei thaw wa jooh hi yow kær ya ini i thaw dei miat wei wow chna ya ka tyndur (Furnace) da kawa toh rukom yow yoh u thang ya i jhep kat wow yoh u pynemkaam chwa,” da ong u Moonlight.
Da ong u leh wa waroh kitu ki chong wa pyrchah toh kiwa tipmit lut u ki waheh chnong wei hawa kylli u iyi i daw wa pyrchah ki, da jubab ki wa lada tip u klam deiwa toh rukom, ki chah bait ki. Wei ym em wa bien leh u kær, u dam u noh jhep cha sarok wei na ini i daw da khang noh.
Kamtæ da ong u wa lada tip u klam du iwa yoh bait tangwa lada ym tip du ki wym yoh bait.
