Ki waheh chnong ka thaaiñ Narpuh deilang waka KSU Narpuh Circle da chna ki da ka Joint Committee kawa da em 19 tylli ki chnong wa da soi ya ka dorkhat kawa da lai e cha u DC ka East Jaiñtia Hills District ynne ka sngi hajrong i sih wa cha palat pood u sarok NH6 nadooh na Mynkre hadooh Malidor deiwa ong wa ini ymtoh de i sien wa nyngkong wa da wan ood ki yow dawa pynchna ya uni u sarok wei ymtoh de leh i wym tip ka sorkar kamjooh ka NHAI wei wot hadien wa da tuklar da ka High Court ka Meghalaya leh ym em pynchna ya uni u sarok.
Uni u sarok uwa da sih hadooh kattæ kattæ da wanrah u yei sahkut kari dei langær kamjooh i sih kari wei ym man de wow lai khamtam ki kari khian wei dei kjat pathan ym nood de ya chah tyrrah ha ki kari kiwi da hap lai khweng khweng nei joor wa boon thlu uni u sarok.
Ka Joint Committee da beiñ joor ko ki yeini wym bien ka NHAI wow pynchna ya uni u sarok kamjooh ya ka sorkar ka wym ye u pynbor yow yoh da u sarok wa miat, ka wym pyrkhat de ya kiwa chong chnong wei ini toh i wym ye de u pdiang.
Kamtæ da dawa wow pyndap noh wut-wut ya ki thlu wei wow siang psiang, toh leh u pynboon ya ki kor, ki kari wow pynchna ya uni u sarok kamjooh ki bru wei toh u khut leh da ki bru wa stat wa chemphang yow batai kammon u pynchna ya uni u sarok wei wow pyndooh syndon yei oor khyndaw ha Sonapur Tunnel.
Da ong leh wa ym yahaap de wow khrong dan ka NHAI na ki Toll Plaza lada ym ye wow pynchna ya u sarok wei ym yahaap hi de wow ong wa uni u sarok toh u National Highway uwa da man kam u sarok moo sarok khyndaw donhi u wym hoi hi de tang u pynemkaam leh.
Hajrong ini waroh, da e por 7 sngi nadooh ynne wow pynchna ya u sarok lym kamtæ u khang noh ya ka Toll Plaza wa em ha u NH6 wei u e FIR leh pyrchah ya ka NHAI da waroh kiwa chong chnong kani ka thaaiñ wei ym bien de u wan pyntip de cha ka sorkar neini chakhmat heiyatoh wa ini wei u pynyoo bait dei kaam.
Ya kani ka dorkhat da phah leh cha u Montri sorkar, u Kyrmen Shylla wa cha ka Santa Mary Shylla, MLA.
Discussion about this post