Ka Regional Committee wa da thung yow pynbait ya u pood ka West Jaiñtia Hills da pynkhreh ko wow e kti noh ya ka Report pynbait pood cha ka sorkar jylla hapoh ar bnai.
Hawa pyntip yeini hadien ka yalang ynnin ka sngi, u Chairman ka Committee uwa man leh u Symbood Montri Rangbah ka jylla, u Sniawbhalang Dhar da ong u wa da phah ya ki bor District wow pynkhreh ya ka Report wei da paan por ki wow pyndep hapoh ka chi bnai næ ar bnai.
“Chisien wa dadep pynkhreh ya ka Report, daw e kti noh cha ka sorkar jylla yow puræ chwa wow yachem wa ki bor ka sorkar Assam”, da ong u.
Hajrong i dawa wow pynuiñ biang ya ki 36 tylli ki chnong ka Block-I cha Meghalaya, u Sniawbhalang da ong u wa toh iwa sakhiat wa ki paidbah da pynsñiaw ki yeini wei ka Committee da chim ko yeiwa da thoh ki ya waroh ki mat wa i kyrpaad yong ki.
“Ki sorkar yong ki ar jylla daw chong ki wa ki ar tylli ki Regional Committee, wei daw chim yei rai hajrong ka Report yong ki heiyatoh wa ini i kaam”, da ong u Sniawbhalang.
Da pyntip u wa ka Regional Committee daw chong yalang biang ko ha ka tayaaw wa ar næ wa le yong u Duyatra (Jan), 2025.
Ha kawi ka liang, u Symbood Montri Rangbah da pynsñiaw u wa ka sorkar da raikut ko wow pynbait ya ki kaam khappood.
“Ki Montri Rangbah ka Assam wa Meghalaya daw pynbait ki ya ka tarik wow lai hiar yow pait ya kini ki thaw wa em i yakajai”, da ong u Symbood Montri Rangbah.
Discussion about this post