U Montri Rangbah ka jylla, u Conrad Sangma hadien wa dep u wow embynta ha ka yalang wa khut da u Montri Rangbahdooh ka ri, u Narendra Modi hajrong wow pynsmat yei e tika.
Neiliang u Conrad uwa da em ha Jowai da chimbynta u lyngba ka Video Conference wei da khana u wa da booh thong wow e tika 9 lak sien ha kini ki chi bnai chiteiñ chwa wow poi u snem thymme.
Ha Meghalaya hadooh ynnin ka sngi kiwa da yoh tika chisien da em ki 11,09,915 ngut iwa man 54.8% wei da em 9.15 lak ngut ki wym pu em yoh tika chisien leh wei ini i booh thong u Conrad leh man ko kam chibynta i thong ka sorkar India wow e tika 100% cha kiwa chong chnong kiwa da dap 18 snem wa waroh toh u yoh tika ki ym duna chisien.
Ha Meghalaya yow ye ko u poi cha ka thong wa 9 lak sien i e tika ha ki sngi wa dang sah uni u snem daw hap ko wow e kamwa 20,000 sien chi sngi i wym pu em ye u poi nadooh wa sdang wow e tika hapoh ka jylla.
Hapoh ka jylla chi lak sien da chimpor 12 hadooh 15 sngi wow e iwa mut wa ha chi sngi da e kamwa 7000 sien iwa da duna da 13,000 sien na i thong.
Hapoh ka jylla da em leh 6 tylli ki District hadooh ynnin ka sngi ki wym pu em poi 50% kiwa da dep yoh tika chisien heiwa ynnin ka sngi da ye wow e tika 7502 sien.
Ka sorkar pyrdi da booh ko ya ka thong 100% yow lait u chah ktah biang ha ka khlam yow ye u lai chakhmat deiwa chngaaiñ wei khlem i thut.
