November 28, 2019

Hapoh chi minit kut ka Dorbar Tlang ka JHADC

Jowai: Ynne ka sngi ye ko u man ka sngi wow sah khana parom ha ka JHADC heiwa ka Dorbar Tlang yong ka Council kawa toh u man ynne wa mynstep ka 29 tarik da pynkut noh ya ka du hapoh chi minit donhi.

Ha kani ka dorbar ynne ka sngi, u Dy. Chairman ka Council, u Ailad Bhoi uwa toh u pynlai ya kani ka dorbar da ong u wa neidaw wa kulmar u ya ka hukum ka Meghalaya High Court kawa da phah ya oo wow pynlai ya kani ka dorbar wa khut pynman da u Chairman katwa kamtæ da pynkut (Prorogue) noh ya ka dorbar.

Advertisement ad1

Ha kani ka dorbar ym em u yoh u yaklam hajrong kawon kawon ka phang katkam wa da booh wow yaklam ha ka wei da kut noh ko du hapoh kamwa chi minit donhi.

Kam wow pynkynmoo heini ka yung bichaar Meghalaya High Court ynnin ka sngi da hukum ko wa ya ka dorbar ka JHADC toh u pynlai da u Dy. Chairman ymtoh da u Chairman khnang wa ka dorbar wa da booh tarik chwa ym thut ko.

Kani ka mukotduma wa yaleh u Andrew Shullai toh hadien wa u Dy. Chairman da khut pynman u ya ka dorbar wow jied ya u Chairman ha ka 9 Naikhynde 2019 heiwa da jied ya u Finelyness Bareh hadien wa ieh noh u Lakhon Biam ya kani ka chuki u Dy. Chairman yeiwa u Shullai da ong u wa ini i pynman dorbar da lai lait i ya ki kyndon ka aiñ neibhah kani ka sngi ymtoh u man ko ka dorbar wa da yohbor wow jied ya u Chairman thymme.