U Inspector General (IG) ka Border Security Force (BSF), Meghalaya Frontier u Hardeep Singh ynne ka sngi da ong u wa ym yoh yoh yutip wa em ki seiñ kieñ suloi ka thaaiñ mihsngi ha Bangladesh.
U Singh da ong u wa katkam wa pyntip da ka Border Guards Bangladesh (BGB), ym em ki thaw wa pynemkaam da ki seiñ kieñ suloi ha Bangladesh.
Chooh chooh da pyntip u wa ym tip yei em ki thaw namo ki Camp ki yong ka Hynniewtrep National Liberation Council (HNLC) ha Bangladesh.
Ha iwi won i liang, u IG da ong u wa da yooluti wa i kær pood Indo-Bangla daw pyndep hapoh chi snem.
Da ong u wa la kamwa 70% naka 443 Km u pood Indo-Bangla wa em hapoh Meghalaya da ye wow pyndep. Heijooh i por da ong u wa em ki thaw wa ka BSF hap ko wow yoh bor chwa naka BGB chwa wow pteiñ yei kær.
“Da em 13 tylli ki thaw wa hap wow kær pood cha baar i 150 Yards na u pood ki ar ri,” da ong u.
Katkam ka aiñ kær pood ha pyrthai, i kær pood ha waroh arliang toh u jngai ki 150 Yards na pyrdi.
U BSF IG da pyntip u leh wa kiwa khayi tooh da pynemkaam ki ya ki bynta ki wym pu em kær yow khayi tooh yaki masi kamjooh kiwi ki mar.
Heiwa ha u snem 2020 ki mar wa da yoh u kem da chongdor ki T. 40 klur kiwa boon toh 10,000 tylli ki masi wei da kem ya 202 ngut ki bru wa thmu wow psiah tooh wa kynthup ya ki bru wa leh yaki kaam khayi tooh.
