Ki warep yong ka chnong Bataw kiwa em hapoh yong ka Mait Lynti Rural Development Society (MLRDS) dei mynsien wa sñiawkhia hajrong i laitlan yong ki masi ha ki thaaiñ Bataw wei deiwa dap dei tieñsar wa khroo yei pynsih ki masi ya ki mar rep yong ki kam u syiñ, u chyrmit wei kamjooh wa kiwi kiwi de ki mar rep kiwa hap ieh hadooh kini ki bnai tlang.
Kamtæ hajrong ini, neiliang yong ki warep da booh ki yei kyrpaad joor ya ki tre masi wa u khang pyrchah ki u lai kulmar ki masi yong ki chapoh khloo neidaw wa em ki mar rep yong ki. Kiwa chare masi tooh u pait bha ki ya ki masi yong ki neidaw lada jia wa ki masi yong ki pynsih ki ya ki mar rep yong ki, wanrah ko yei dooh nong wa khroo ya ki warep.
Khaddooh khatwai neiliang yong ki warep klam che ki wa lada jia wa ki tre masi ym chimkhia ki ya kani ka wyrta kawa ki da kyrpaad ki, ym yohsa ki wow chim da kiwi ki luti neibynta i bha i miat yong ki warep, ong ka kyrwoh wa da phah da ki warep ka MLRDS.