Ynne ka sngi da pynman ya ka yalang hapyrdi ka JAC wa ka JHCMA heiyatoh wow pynthymme ya i dor bai kit mar ki truck hapoh ka jylla khamtam na wei cha ki karkhana pynmih khyndaw-bilat iwa ka Joint Action Committee (JAC) da dawa ko wow pynkrehkaam yei dor thymme katkam ka hukum ka sorkar wa da pynmih nadooh u Duyatra (January) 2020 katwa neiliang ka satri ki karkhana pynmih khyndaw-bilat namo ka Jaiñtia Hills Cement Manufacturers Associations (JHCMA) won da ong ko wa ini daw ktah i ya ki karkhana wa em ha kani ka thaaiñ.
Katkam wa man hi, kani ka yalang da man ko kawa sahteiñ na ki daw wa boon neidaw wa pynwit ka khlam u COVID-19 tangwa neiliang ka JAC neipor cheipor da pynman yalang ko wow dawa pynkrehkaam bait ya kani ka hukum.
Kani ka hukum ka sorkar toh wa da pynthymme ko yei dor wow kit mar heiwa i dor bai kit mar wa thymme u man i chi ton ha man ka chi kilometer u man i T. 9 ha u sarok psiang, T. 11 ha u sarok moo wa T. 12 ha u sarok khyndaw wei yeini ka seiñ JAC da dawa ko wow pynkrehkaam noh wut-wut.
Hadien wa da pyndam ya ka yalang da boonsien (neidaw u COVID-19), ynne ka sngi won neiliang u Commissioner & Secretary ka chnat Transport uwa man leh kam u chongknor kani ka yalang da paan u ya ki yukheiñ na ki arliang khnang wow ye u bichaar bniah yei jooh.
Da pyntip chooh chooh u wa hadien wa da bichaar bniah yeini i kaam daw booh yeijooh ha ka miej u montri rangbah ka jylla wow leh yeiwa emkaam hapoh chi tayaw.
