Ki nia Politics katwa dang jan ki bnai cha ka Election 2023 da sdang ki wow mih wot hapyrdi ki Party wa yakrehlang ha ka sorkar Meghalaya Democratic Alliance (MDA), heiwa ha ka 28 tarik uni u bnai, kiwa yahkhmat ka UDP da klam paidbah wa lada ka UDP u dam ko u kyrchaan ya ka sorkar daw wan ka President’s Rule, neibhah wa ka sorkar daw haap noh ko.
Hawa yaklam wa u National Vice President ka NPP uwa man leh u Symbood Montri Rangbah ha ka sorkar MDA, u Prestone Tynsong da ong wa ym khuslai u wa lada wan ka President’s Rule lane kayi kayi leh, wei da pynrap u wa lada sñiaw wa hadooh katni ka sorkar sih palat ko hapoh i yaklam ka NPP, da bha palat wow wan ka President’s Rule ym toh de u yang tang chi sngi leh.
Da ong u wa ha i por Election da em bait i ya kawang ktieh, tangwa neiliang ka NPP ym kawang ktieh ko ya kiwon kiwon, tangwa daw pynyoo ko cha ki paidbah ya ki yong ka hi ka yurim. Da ong u ileh emkaam ki wow yang hadooh itæ ya nang sih, “Ieh u wan ka President’s Rule ieh u man noh ka Election wei ieh ya ki paidbah wow rai biang ki.”
Da ong chooh chooh u wa sñiaw soohrkhai wow yoo ya kam kitæ ki klam wei tip la i klam wa mut hok næ du i klam Drama ym tip de u sñiawthooh.
U Prestone da ong u wa iwa phylla toh hawa em ka Coordination Committee ym jooh em wa klam iyi iyi, wei iwa phylla chooh chooh toh lada em ka yalang ka MDA leh ym jooh em wa klam, hei yong sakhiat toh wow pynmih kam kitæ ki phang, toh u yaklam wei ya syllok tangwa kam itæ ym em neibhah wot ya ka kaam khappood leh hawa klam lane batai, da ong ki wa da biang, tangwa katni won cha baar won mih kitæ hadooh wym ye de u sñiawthooh.
U Symbood Montri Rangbah da ong chooh chooh u wa da yakrehlang (Coalition) nadooh u 2003 hadooh 2018, wei iyi wa da yoo u toh wa da jan ka Election. Kitu kiwa emlang ha ka sorkar da sdang ki wow pynkit pap cha ka Party wa rep heh, wei ini toh du da i buit wow pynbiej ya ki paidbah wa thap Vote, “Lada i kaam toh iwa khia sakhiat ym emkaam wow yang,” deiwa bynrap wa ka NPP lada toh i pap yong kiwon kiwon daw kit bait.
