Ka Hill State People’s Democratic Party (HSPDP) hapoh ka National Federation of New States daw dawa ko wow phiah noh ya ka jylla Meghalaya ha ka yung dorbar tlang yong ka Parliament.
U President ka HSPDP, u KP Pangniang da ong u wa ka seiñ da booh ko ya i dawa wow em neibynta jar ka jylla, heiwa da lai kyrchaan ko ya ka yalang paidbah kawa khut ka Garoland State Demand Committee ha Tura ha ka 29 tarik u Naichiphaw.
Da ong u wa ha katai ka yalang da wan kyrchaan leh da kiwi kiwa dawa jylla hapoh ka satri yong ka National Federation of New States ya kawa ka HSPDP leh da chah khut sñiawbha ko wow emlang ha kani ka Federation.
Da ong u wa ka HSPDP daw yachem lang ko hapoh ka National Federation of New States ha Mawphanlur, West Khasi Hills ha ka 30 tarik uni u bnai hei wow yaklam pynbha ya ini yow lai cha Delhi wow pynsñiaw ha Parliament cha ka sorkar India wa em kiwa dawa jylla thymme.
U Pangniang da ong u leh wa hadien ka Election ha ka jylla, ka Party daw khut ko ya ki hajar ki Khasi Jaiñtia cha ka yalang wow pynsñiaw ya i sur cha ka sorkar India wow pynman kaam yeiwa angnood wow synchaar ya i dæ deiwa yoh yoh jar ka jylla ha ka yurim i ktieñ i thylliej, ka riti dustur wa i rukom man wa kyrpang.
