Ynne ka sngi kawa man ka sngi nyngkong yong ka Dorbar Mang Tangka ka JHADC, u MDC ka Congress, u Andrew A. Shullai da kylli u hapoh ka Dorbar katwon tylli ki NOC wa da e ka Council ya ki Coke Factory hapoh u pood yong ka nadooh ka 1 Khonchonglad (November) 2020 hadooh 1 Wisu (March) 2021.
Hawa jubab yeini iwa da kylli, u CEM ka Council, u Thombor Shiwat da pyntip u wa hapoh kini ki por da e hadooh 14 tylli ki NOC cha ki Coke Factory wa mut wa hapoh soo bnai ebor ka Council wow chna ya ki 14 tylli kini ki karkhana hapoh u pood yong ka (East wa West Jaiñtia Hills).
“Yoosar ka Karkhana Coke leh kawa hoi bha, wa myntoi bha ya ka Council,” da ong u Andrew deiwa pynrap kylli ya ki kyndon wa ki kot ki sla wa emkaam chwa wow e ya ka NOC ya ki.
Neiliang u Thombor da jubab u deiwa ong wa ki kot ki sla wa emkaam wow chna ya kini ki karkhana toh ka NOC na ka chnong, u Dolloi ka Elaka, ka Single Window Agency (SWA), ki kot thaw, ki kot Registration ki karkhana wa kiwi kiwi deiwa pynrap u leh wa da em ki kyndon wa da booh heiwa hadooh katwon i jngai ki na ki um ki wah wa kiwi kiwi.
