I pyndait ya ki Smart Meter yong ka chnat Bordiñ daw lai ko chakhmat ha ka jylla, hadien wa ka sorkar India da booh ko ya ki kyndon neibynta waroh ki jylla ha ka thaaiñ Mihsngi ha ka yalang wa da pynlai da u Union Power Minister, u R. K Singh kawa da man ha nongbah Guwahati ha 3 tarik uni u bnai.
U Montri wa pait ya ka chnat Bordiñ ha ka jylla, u Prestone Tynsong da pyntip u wa ha ka yalang da rai wow lai chakhmat wow pyndait ya ki Smart Meter, wei da booh thong wa ye wow pyndep rap boon hapoh yong u Wisu (Mar) 2022 wow yada nei dooh nong yong ki jylla ka thaaiñ na ka chnat Bordiñ.
Hadien i yachem wa u Union Power Minister, neiliang won u Prestone da lum yalang u ynne ka sngi wa ki heh ka chnat bordiñ yong ka jylla. Da pyntip u wa i pyndait ya ki Smart Meter da lai ko chakhmat wei hadooh katni da ye wow pyndep kamwa 15,000 tylli, wei da pynsñiaw wa i yooluti wa hadooh u Wisu 2022 daw ye wow pyndait kamwa 1,80,000 tylli ki Smart Meter ha ki manyung hapoh ka jylla.
Da ong u wa kamwa man katni, awjan waroh ki Company pynmih bordiñ yong ki jylla North East da doohnong bha ki, neitæ i daw ka sorkar India da wanrah ko ya ki kyndon hawa yatoh wa i rukom saam bordiñ, heiwa da pynsñiaw u wa daw ye wow bood ya waroh ki kyndon ha ki sngi wow wan.
Hawa kylli hajrong i pdiang ki paidbah, u Prestone uwa man leh u Symbood Montri Rangbah ka jylla, da ong u wa ki paidbah hap ki wow pdiang, neibhah i pyndait ya ki Smart Meter daw yarap chiboon ya ka chnat wa kamjooh ya ki paidbah wa pynemkaam ya i bordiñ, la da u Prepaid næ Postpaid ym em de i leh tooh. Da ong u wa kamwa man katni, da em bait ka ujor wa ka bai bordiñ wa hap su ym yahaap ko wei em i tkoh.
