Shillong: U Symbood Montri Rangbah ka jylla, u Prestone Tynsong da ong u wa i wanpoi u Chief Justice wa thymme cha ka jylla hapyrdi i khang chnong (Lockdown) toh neidaw wa chah ka kaam, wei ym em i maa ya ka jylla neibhah da pyndep ya iwa emkaam waroh.
U Justice Biswanath Somadder da poi u ha Shillong ynnin i miet ka 26 tarik, wei ynne ka sngi da baam smai u kam u Chief Justice ka Meghalaya High Court. Ya uni uwa bichaar wa rangbah ka jylla da pynsmai da u Lat, u Tathagata Roy ynne ka sngi ha Raj Bhavan Shillong.
Hawa kylli hajrong i jhan wow wan chimkti yaka kaam ha ini i por, u Prestone da ong u wa man u u hehdooh ka Judiciary, wei kamwa man wa emkaam ya u Chief Minister ha ka jylla, kamjooh emkaam ya u Chief Justice kam u khliehdooh ha Judiciary.
U Chief Justice Biswanath da wan u na Allahabad da ka kari yow poi cha Shillong, hawa kylli chooh chooh, u Prestone da ong u wa i Test ha luti wa wan leh da pyndep wei da hap u wow pyndep ya waroh ki kyndon wa da phah da ka sorkar pyrdi waka sorkar jylla yow lait na i ma næ chahktah ha u COVID-19.
Discussion about this post