Ynne i janmiet u kyrtong ka Congress na 19-Jowai South Constituency, u Saron Paswet da pynman u ya ka yalang paidbah ha Madan Pohskur, Mustem heiwa ya ka yalang da pynlai da u Waheh Chnong, u Heimon Shylla deiwa sakhilang kiwa boon kiwa da wan na ki chnong nadooh na Ialong, Chyrmang, Mustem, Dulong wa kiwi ki de wa em ha ka Constituency.
U waheh chnong hawa e yei klam da kdaw u ya ki kaam wa da leh u Saron ha ka chnong ka thaw ha kini ki snem wa dadep kiwa kynthup nadooh wow kær ya u Moo Mustem uwa man u yurim ka chnong, u kær kynroh ya ka yungmane ka Balang Presbyterian najrong kiwi de.
Da yarap u leh wow chna ya ki paikhana, ki Solar Street Light, u pynbiang um dih, u yarap pynwandur ya ka Riti Synchaar ka Dorbar Chnong wa ki Tin cha ki manyung wa duna hei yoh i laa.
Chooh chooh da kdaw leh ya i yarap nadooh u sarok, ki luti syngkieñ wa kiwi heipor wa pynman ya ka Assembly ka Balang Presbyterian ha u snem 2022.
Neiliang u Saron Paswet hawa e i klam da e khublei u ya ki paidbah wa da pynjop ki oo ha ka Election wa dadep deiwa ong wa da kreh u katwa joh i bor u wow pyndap yeiwa emkaam ki paidbah.
Da ong u wa ha ki san snem wa dadep em bait iwa ymye u wow kynjoh kamtæ da wan biang u ynne ka sngi wow paan ya i kyrchaan na ki paidbah ka chnong Mustem.
Chooh chooh da ong u wa u waheh chnong da khana u ya ki kaam wa da leh ha ki snem wa dadep tangwa ki khon ka chnong Mustem sakhi ki ya kitæ waroh wei ini toh nei chimkhia u waheh chnong neibynta ki khon ka Mustem.
U Saron da ong u wa kam u khynroo kam u Executive Member ymtoh wa lai luti u du neibynta ka Constituency tangwa neibynta ka JHADC hi waroh kawi heiwa da kdaw u wa heiyatoh wa ka tulop em ki por yoh kiwa kreh ya ka tulop soo bnai tangwa ki MDC khlem tulop wei ini toh nei thung kreh chwa da ki MDC warim heiwa heithaw wow em du 700 ngut kiwa kreh ha ka Council, da em duna 1800 ngut katni.
Heijooh i por da ong u wa heipor wa man MDC u da lai booddien ya ki karkhana pynmih khyndawbilat wa ka dan wa toh u yoh na ki tangwa da sai ki ya ki kot ki sla kiwa pyntlot bha ya ka Council heiwa da tyrwa u wow pynkylla noh ya ki kyndon khnang wa ka JHADC u yoh ko ya ka bhah na kini ki karkhana.
Da khana u wa heipor wa phiah ya ki Constituency ini wadep da boon kiwa wan wow pynsñiaw wa kwah ki wow neh ha ka Constituency yong oo tangwa hadien ini ymye de u wow leh iwon iwon, deiwa pynrap wa daw chakri u ya kiwi ki chnong wa dang psiah thymme.
Da kyrpaad u leh ya waroh wow jied ya oo ha kani ka kynti wei manda jied ya oo sa ha kani ka kynti, ngait skem u wow ye biang u kreh chooh chooh ya ki paidbah wa ka chnong waroh kawi hanla da em u kyrtong uwa napoh ka chnong ki.
Kiwi kiwa klam ha kani ka yalang da kyrpaad ki ya ki paidbah wow jied ya u Saron ha kani ka kynti kam u MDC.
Ha kani ka miet wot hapyrdi i dait i kjam, ki paidbah da ki hajar da wan ki cha ka yalang wow pynyoo yei kyrchaan ya u Saron Paswet.
Discussion about this post