Jowai: Ynne ka sngi Pynsiñ 18 u Wisu, ki khon ka Weipun Wet, Wahsynji da pyndep ki yei syrdep phlang yei Yung Blai yong ki hapyrdi i chimbyntalang ki kur ki jait, ki lok ki jor, ki kha ki man wei yoh yei pyrthai mynder wa miat wabha kani ka sngi daman ko kawa lai bait lai ryntih wei yoo chongbru chongblai.
Ha kani ka sngi chwa wow sdang i kreh yei kaam, neiliang u Kñi, ka Kchu ka Siang yong ka Kur Paswet, deilang ki kur ki jait da yieñ ki wow pyn-ap Blai, pyn-ap Syiem neibynta wow man kani ka sngi kawa hun wa suk i yong ki Blai ki Syiem kamjooh yow man kani ka sngi kawa yoh yei bneiñ i pyrthai iwa miat wa bha.
Kamwa khanna parom, kani ka Yung Blai ki yong Paswet, Wahsynji toh kawi na ki yung warim dooh kawa da pynkhai pynyieñ nadooh wa sdang ka niam hapoh ka raij ka chnong wei man ko leh ka yung heiwa chibynta ka lehniam yong raij ha ka step Muchai yong ka chaad niam Behdieñkhlam da pyndep ha kani ka thaw.
Hawa pait liang wanang ha kani ka juk wa katni yoo, chem hapoh ka chnong ka raij dap sadu i kylla nei warim chei wa thymme, heiwa niar wow yoh u yoo u sakhi yeiyi yeiyi i warim. Man won iyi iyi iwa yoosuk wei sñiaw sarong leh u ong, wa ki khon ki ksu ka Weipun Wet kam ki pateiñ kani ka juk wat hapyrdi i kylla yong i por i samooid, da ka luti ka yurim wa yah sikai ki manchwa yieñ skem ki wow pynneh pynsah yei naam i burom wa ki kha kti kiwa ki warim ka yung ka sem yong ki da booh da pynkhai pynyieñ ki nadooh ki por yong u Dong Sniriang kiwa man katkam ki hukum, adong niam hapoh ka chnong ka raij.
Discussion about this post