Ynne ka sngi i yakhih pyrchah ya i thmu ka sorkar pyrdi wa yahkhmat da ka BJP wow pynman aiñ ya ka Citizenship Amendment Bill dang pteiñ i ha jylla Assam.
I yakhih ha Assam da man i iwa joor bha ynnin i sngi khamtam hei janmiet heipor wa yañia hajrong kani ka phang ha Rajya Sabha wei da joor chooh chooh i hadien wa da pdiang ya ka hapoh kani ka yung dorbar.
Hadien wa joor i yakhih neiliang ki bor sorkar ha ki 11 District ka jylla da pynkrehkaam noh ki ya ka Curfew, da pyndam leh ya ka Internet wa ki SMS kamjooh da khut leh ya ki chipai wow sonteri wei wow wanrah biang yei chongsuk.
Ynne i step hanlada krehkaam ka Curfew wa i em ki chipai, ki paidbah da mih biang ki cha sarok wow pynman yakhih hajrong ini i thmu ka sorkar pyrdi.
Ki paidbah da khang ki yaki sarok kam ha sorbah Guwahati da ki moo wei da thang diñ ki leh hapyrdi sarok kam ka dak wow pyrchah ya ini i thmu.
Katkam ka yutip wa yoh da ong wa da em kamwa 4 ngut kiwa mynsoo ynne ka sngi ha Guwahati hadien wa mih i kulmar hapyrdi ki paidbah wa ki pulit.
Iwi na ki daw wa ki paidbah da pynsñiaw ki yei mynsien wa pyrchah ya kani ka aiñ toh wa daw wai laad ko ya ki bru na Bangladesh u wan seiñ khih ki hapoh ka jylla wei ini daw ktah kylla ko ya ki hadien ha bood.
Discussion about this post