Ynne ka sngi, u Sniawbhalang Dhar, MLA ka 1-Nartiang Constituency kamjooh u Montri sorkar Meghalaya da lai pait u ya ka chnong Tamu kawa jngai kamwa 6 Km na Namdong deiwa synraan lang u MDC ka Ummulong-Moodymmai Constituency, u Jesse Suiam wa ki katu katni ngut ki waheh chnong yong ki chnong wa marjan.
Kiwa chong chnong yong ka Tamu wot hapyrdi u slap wai dait-thah, da mih paidbah ki da ki spah ngut cha kani ka yalang u Sniawbhalang.
Hawa e yei klam, kiwa boon ki waheh na ki para jan chnong da yaroh ki ya ki kaam u Sniawbhalang khamtam ya u sarok wa da suk ki katni u lai u wan nadooh wa jop u Sniawbhalang kam u MLA ha u 2013.
U Jesse Suiam hawa e yei klam, da ong wa u Sniawbhalang toh uwa mihkhmat u wym em i pait chilliang ya kiwon kiwon, wei wa man u u bru wa yatoh wei ktien wei kaam, hawa kynmoo ya u sarok, da ong u wa ha ki por wa dep, ki soh ki jhoor, ki mar rep mar riang da man ki kiwa sepai neibhah hap yang dei yong tayaw yow pynpoi cha yaaw, katwa katni won nadooh wa jop u Sniawbhalang kam u MLA, ki sarok dapoi lut awjan ha waroh ki chnong wei ki mar rep da ye ki u poi cha yaaw heipor wa biang wei ym man de i dooh myntoi ya ki warep, da kyntu u leh wa toh u em i sñiawngooh ya kiwa lehbha deiwa ong u wa ki wym em i sñiawngooh ya u bru, ym tip ki leh u sñiawngooh ya u Blai.
U Sniawbhalang uwa man leh kam u kyrtong ka NPP, da ong u wa i wan ha Tamu ym em mut ware ko u yalap Election, man ko i wan pait yei roi i paar wa da wanrah u ha kini ki thaaiñ. Da ong u wa oo kam uwa mihkhmat ym jooh pait chiliang u ya kiwon kiwon ki khon ka Constituency, ym phær lada ym em thap ki cha oo ha ka Election 2018, tangwa kam u pa ka Constituency ym hoi u leh dei arsap ya waroh ki khon yong ka. Da khana u leh ya chiboon ki kaam pynroi wa da wanrah hapoh ka Constituency, deiwa ong wa lada kheiñ dei yong yung dapoi da ki phaw hajar yung wa yoh yarap, lada kheiñ dei yong chnong yonglang leh da ki spah klur wa da pynyoh hapoh ka Constituency, hanla kattæ leh katwa dang lai ki por ki sngi, dang boon hi ki kaam ki wym pu ye u pynbiang.
Hawa kynmoo ya ki por wa da dep ha u 2013, da khut ya oo wow wan wai Fete ha ka chnong Tamu, tangwa sahkut u ha chiteiñ luti khlem yoh u wai Fete neidaw wa sah slip ka kari. Mar sien jop u ha u 2013 da pynsmat u wut-wut u yaklam neibynta wow chna ya ki sarok hapoh ka Constituency wei wa ka surok Tamu man ko kawa nyngkong wa yoh u pyndep.
Da khana u leh wa ha kini ki bnai wa da dep, da ki spah ngut kiwa kyrchaan ka Congress ha u 2018 da wan psiah ki cha ka NPP wei ini pynyoo ko wa ki paidbah wa thap Vote kyruiñ khmat ki cha uwa mihkhmat wa ye u lehbha wei u wym boh wym ksoh hanla ym em yoh u yei kyrchaanlang ha ki por wa da dep.
Heijooh i por leh da ong u kam uwa mihkhmat em bait i wym toh wym biang, em bait i chah tim chah pynbaad, tæ khnang yow lait na waroh ini i eh, da kyntu u ya ki paidbah wow pynjop emburom biang ya oo wa ya ka Party NPP ha kani ka Election 2023.
