Hajrong i lai ujor ka Dorbar Chnong Chyrmang Neiñ cha u DC ka West Jaiñtia Hills ynnin ka sngi, deiwa ong wa ka Dorbar Chnong Panaliar da pynkhreh ko yaka “Syntu Ksiar Musical Concert” ha i thaw wa tip kam i Iong Ka Skot khlem da yoh bor naka bor chnong Chyrmang Neiñ hawa i thaw haap i hapoh u pood u ang yong ka. Ynne ka sngi won neiliang ka Dorbar Chnong Panaliar da pynche ko wa katai ka thaw toh kawa haap hapoh u pood u ang yong ka hi nadooh ki por warim.
“Nadooh nachwa heiyatoh wa katai ka thaw lada em kawon kawon ka tamasa næ i yalang paidbah, yei e bor ne NOC hap yoh bait ki naka Dorbar Chnong Panaliar,” ong u Careme Phawa, General Secretary Panaliar.
Da ong wa hadien wa yoo ki yaka khubor heiyatoh wa katai ka thaw, dap ki dei khyrngiat, tangwa neidaw wa em won ka dobar chnong yaka yurim wa skem kamjooh ki kot ki sla khamtam ki NOC wa da jooh e ki, najrong ki Landholding, i thoh dustabit hawa ya dai ya thied thaw, neitæ i daw pyntikna ki wa i thaw haap ko hapoh u pood u ang ka Dorbar Chnong Panaliar.
“Sñiawthooh i wa hawa pynman ya kawon kawon ka tamasa hapoh u pood u ang yong i hi, ym em wa ye u khang,” ong u Riquoma Rq. Laloo, Waheh Chnong Panaliar.
Neiliang u Waheh Chnong da kyntu u yaki paidbah wym toh u sñiawthooh bakla ne artatien ki, neibhah wa i pynkhreh man i iwa lai bait, wei ka Dorbar Chnong leh dalai ko chakhmat yei kaam.
Pyntip ki wada dep yoh bor (Permission) ki leh naka yung krehkaam u Deputy Commissioner West Jaiñtia Hills District, hajrong ka yurim wow yaleh ki wow pynmiat pynbha yaka Pynthhor Wah kawa haap hapoh u pood yong ki.
Heijooh i por ngait skem ki wa kani ka Musical Concert ka wow man haka 03-04-2021 u man ko kawa jop dei yakrehlang ki paidbah ki wow wan hiar cha katai ka thaw.