Ka lympung yalehbol wa pynlai da ka Priang Youth Welfare Sports Club (PYWSC) kawa tip kam ka 1st Knock Out Tournament da poi ko cha wakut ha ka yakhun Final wa da pynman ha ka 20 tarik uni u bnai.
Ha kani ka sngi da emlang u Batskhem Marang kam u kongsan wa u Lawyerson War kam u symbood kongsan wei chwa wow yakhun ya ka Final da em ka yalang wa tbian kawa pynlai da u Newyearborn Sumer uwa man u Secretary ka Club.
Neiliang u Lawyerson War da e u ya ki kyntien sneiñ kyntu ya ki khynroo wow im sngi ki ha ki kaam yalehbol wa kiwi tawon ki jait yalehke Sports wow pynku ya ka Ri Loom Jaiñtia ha ki yalehke Sports.
U Batskhem Marang hei klam yong oo da kyntu joor u ya ki khynroo yong ka chnong ka thaw wow kiar ki na kiwi tawon ki kaam wa sih wei imsngi ki ha ki kaam Sports yow pynku ya ka jaitbru ha ki kaam yalehke Sports.
Da yoh leh kattu katni ki kyntien e mynsien na u Fullstop Syngkon uwa da synraan lang ha kani ka Final.
Ha ka yakhun Final da man ka yaleh kawa yoosuk bha wei ka Ngaitmi FC da jop ko ya ka Shaphai FC lyngba ka yachut Tiebreaker.