Shillong: Phra ngut kiwa mihkhmat cha ka yung dorbar chna aiñ ka jylla da ieh kaam noh ki kam ki MLA ynne ka sngi neibynta wow wai laad ya ki wow psiah noh cha ka National People’s Party (NPP).
Kini ki phra ngut da ekti ki ya ka chithi ieh kaam ha u Commissioner & Secretary ka yung dorbar, u Andrew Simons.
Kini ki MLA kynthup ki ya ki san ngut ki MLA ka Congress wa kynthup ya u Rowell Lyngdoh na Mawkyrwat, u Prestone Tynsong na Pynursla, u Coming One Ymbon na Raliang, u Sniawbhalang Dhar na Nartiang wa u Ngaitlang Dhar na Umroi.
Kiwi won toh ki ya ar ngut ki MLA samen wa kynthup ya u Stephanson Mukhim MLA na Amlarem, u Hopeful Bamon na Sutnga-Shangpung wa uwi u MLA ka UDP na Mawkynrew u Remington Pyngrope.
I ieh kaam kini ki MLA toh sadu 2 bnai wa ka jylla daw jied ko ya kiwa mihkhmat wa thymme cha ka Yung Dorbar chna aiñ ka jylla neibhah i man MLA ki u kut noh i ha ka 6 Wisu (March) 2018.
Kini ki 8 ngut ki MLA daw psiah noh ki cha ka NPP ha ka yalang paidbah ka wow man ha Madan Polo ha ka 4 tarik uni u bnai wow wan.
Discussion about this post