Hiar booddien sa u SK Sunn ya ka thaw saam um yong ka sor Shillong

Shillong: U MLA ka Mawphlang Constituency uwa man leh u Chief Engineer warim ka Public Health Engineering (PHE), u Syntar Klas Sunn ha ka sngi Choh-that da lai sylli u ya ka thaw saam um dih cha Shillong, kawa em ha Mawphlang wa ya i kreh wow pynbiang um baam kawa dang lai cha khmat katni, ka Greater Shillong Water Supply Scheme (GSWSS) Phase-III.

Kam wow pynkynmoo khajiak wa ha kini ki bnai nachwa u montri wa pait ya ka chnat um baam ka Public Health Engineering (PHE), u Samlin Malngiang da lai u wow leh ya kam kani ka sylli tangwa ha itu i por u MLA ka Mawphlang ym em lang u wei hawa kylli iyi i daw wa ym em u, neiliang u Sunn da ong u wa ymem yoh yutip u hajrong i wan u montri.

“Ha itu i por ym em wa pyntip cha nga wa u montri ka sorkar jylla wa pait ya ka chnat saam um baam (PHE) u wan sylli u ya ka thaw pynlang um ha Mawphlang,” da ong u SK Sunn.

Ye wow kdaw heini wa ha ka 23 tarik u Naisan uni u snem u montri ka sorkar jylla uwa pait ya ka chnat PHE da lai sylli u yei pynbiang um ya ki chnong waphær waphær ka nongbah Shillong lyngba ka Greater Shillong Water Supply Scheme (Phase I&II) kamjooh ka Phase III, kawa ka kaam dang lai ko chakhmat hadooh katni.

Related posts

U pyndam ka Mizoram ya kiwa kreh sorkar ki wym ye wow leh yei kaam yong ki

November 28, 2024

Sdang ka sorkar da ka Community Public Private Partnership deiwa e yarap Rs. 106 klur

November 28, 2024

Ha iwi tawon i liang u MLA ka Mawphlang da pynsñiaw u wa i wan sylli yong oo toh wa sñiawkhia u ya i lati ka um katkam wa mih khubor, tangwa ym em kiwon kiwon kiwa paan yei yarap yong oo hanlada tip ki wa jooh man u kam u Chief Engineer wa rim.

“Em kiwa khanglaad ya ki sahep sorkar wow paan yarap na nga hanlada tip ki wa nga da chakri O ya ka sorkar ha kani ka chnat nadooh wa nga man O kam u Engineer wa khian ka PHE,” da ong u.

Ha i lai sylli u Sunn da li pait u ya ka Treatment Plant lyngba ka Greater Shillong Water Supply Scheme (Phase I & II) kamjooh ki kaam kiwa dang lai yong ka Phase III wa kynthup i pynbiang ya ka Variable Voltage Variable Frequency (VVVFD) cha ki Pumping Station wa ki Automation Control & Visualisation System cha ki Pumping Station.

“Ha ki snem 1978 ka um ymem khleh khyndaw namo jngut ko wei ym palat ya ka 50 NTU tangwa ha ki snem 1990 ter ter i khleh khyndaw ha ka um da poi palat 1500 NTU khamtam hawa joor slap,” da ong u wei ini da pynkhia ko ya ka Clari-Flocculator kawa em katni kawa mang 34.05 Mld Water Treatment Plant.

Da ong wow pynkhooid ya ka um emkaam wow pynboon ya ki jait dawai (Alum Solution) wow pynkhooid ya ka um na i khleh pum pum khyndaw. “I chna sa ya kawi ka Additional Clari-Flocculator wa thymme kawa heh u man ko kamwa da em chwa wa ekti cha ka M/S Tantia Construction Ltd. I chna dang lai ko cha khmat kamjooh ka Separate Inlet Stilling Chamber, Raw Water Channel, Parshall Flume, Constant Head Chemical Dosing Tank wa Flash Mixer neibynta ka Clari-Flocculator wei i chna ya ka Additional Chemical House leh ym pu em sdang.

Neiliang u MLA da kylli u mar khmat u Manager ka M/S Tantia Construction Ltd hadooh katwon wa chim por wow pyndep wei neiliang u Manager u Sudeep da ong u ka kammon kammon ha chwa wow poi ka lyiur u 2019.

Ha iwi tawon i liang, u SK Sunn da kdaw u wa ha ka Phase III, i chna ya ka Intake Well ka wow booh ha Pump House ym pu em dep wei ini pynyoo wa sahkut naka Company wei haap ko u pyntikna cha ka chnat la ka Cutting Edge ka chong skhem namo ym em ha tre (safe bearing strata). “Neiliang ka Company haap ko wow leh wut wut ya kani ka bynta.” ong u SK Sunn.

Heiyatoh wa bha i miat ka umdih, u S.K. Sunn da pyntip u wa ka chnat ym ye ko u leh khapnap hadooh wa ki Cast Iron Pipe (Phase I & II) toh u kylliang noh da ki D.I. Pipe na ka Phase III.

“Hanlada i pynlai um lyngba ki Pipe (Gravity Main) na Mawphlang cha 4½ Mer, Upper Shillong da jan dep tangwa u Gravity Feeder Main neibynta ka Mawlai Nongkwar da sahkut u ha Umshyrpi neidaw wa ym em e thaw ki chipai wow pynlai. Kamjooh u Gravity Feeder cha Nongmynsong wa Pynthor Umkhrah leh sahkut u sahkut ha Polo wa MES Hospital neidaw wa ki chipai ym chah ki,” da ong u Sunn.

U Sunn da pynkynmoo u wa ha ka Dorbar Mang Tyngka yong ka Yung Dorbar Chna-aiñ ka jylla Meghalaya uni u snem, u symbood montri rangbah wa pait ya ka chnat PWD, u Prestone Tynsong, da kular u wa ka PWD ym khang luti ko ya ka PHE wow pynku ya ka roi ka paar. Tangwa neiliang u Chief Engineer, u SK Blah da ong u wa hadooh katni ympu em yoh ki wow sdang biang ya ka kaam pynlai ya ki pipe saam um.