Shillong: U montri wa pait ya ka chnat puræ puthi ka jylla u Lahkmen Rymbui da pynsñiaw u wa i hiar wa i sih ka Result SSLC kawa dang mih toh neidaw duna kiwa lait na ki skur ha ri-loom Garo.
U montri da pyntip u wa hajrong ini, ka sorkar da dep ko wow chna leh ya ka ‘Great Project’ kawa toh ka Committee kawa da thooh bniah ya i daw wa cha Ri-loom Garo wa hiar bha ka Pass Percentage wei yaka bui (Report) hajrong ini, da dep wow phah cha ka sorkar heiwa katni daw booddien kammon wow thooh laad thooh luti wow pynku ya ka Pass Percentage.
Ha iwi tawon i liang, hanla ka Result SSLC man ko kawa sih, tangwa neiliang u montri da pynsñiaw u yei kmen wa khroo deiwa ong wa nachwa ya ka kyrdan ‘Top 20’ da yoh wow ksoh du da ki kattu katni ki skur, tangwa katni won ki skur kiwa boon wot na ki thaain nongkyndong leh da wan ki chakhmat wow emlang ha kani ka thup kiwa ym jooh rap sñiaw, deiwa pynrap wa ym em i yaphær i puræ puthi la ha sor næ ha nongkyndong, iwa chong ha ki khynnah, wei lada kreh chitom la heiwon heiwon i thaw ye bait ki wow e reiñ wa kiwa ha sor, wei ya ini da sakhi naka Result kawa dang mih, heiwa ki skur kiwa na ki thaaiñ nongkyndong kiwa ym jooh sñiaw leh da wan ki chakhmat.
Chooh chooh neiliang u montri da pynsñiaw u leh yei sñiawkmen wa ha kani ka kynti ka Jaiñtia Hills da wan ko chakhmat ha ka Percentage kiwa Pass.
Ha i jooh i por da pynsñiaw u yei sñiaw diaw wa ha kani ka Result da em ki 9 tylli ki skur kiwa da yoh Zero næ kiwa duna dooh kiwa lait, wei hajrong ini da phah ya ka Directorate wow e ya ka Report neiyi i daw wa kini ki skur man ki kamni. Da ong u wa ka Chokpot Higher Secondary School, ya kawa ka sorkar da rai ko wow yarap wa em ha Chokpot tangwa hawa pait ya ka Result yong ka skur na ki 113 ngut kiwa yakhun, kiwa Pass em ki du 13 ngut wei kani da man sakhiat kawa pynsñiaw diaw tangwa iwa e kyrmen won toh wa ki skur kiwa em cha baar ka Shillong leh ym em duna ki.
