U Montri Rangbah ka jylla, u Conrad K Sangma ynne ka sngi da lai pait u syndet syndet ya ka Pine Mount School ha Shillong. Ini i lai pait u Conrad da idæ ya katai ka skur toh hadien wa mih i kynrum kynram ha u bnai wa da dep.
Ha ini i lai hiar pait syndet u Montri Rangbah ya katai ka skur wa da bna naam ka jylla, da emlang leh u Montri ka chnat Puræ Puthi, u Lahkmen Rymbui, u Chief Secretary, u DP Wahlang wa ki sahep sorkar yong ka chnat puræ puthi ka jylla.
U Montri Rangbah da lai u wow pait da ki khmat yei long i man ha waroh kawi ka skur wei da yaklam u leh ya ki wakreh wa kamjooh ya ki khynnah wa sah Hostel ha katai ka skur.
U Conrad da ong u wa hadien i yaklam bniah wa u Montri da pyrkhat wow wan hi cha kani ka thaw, khamtam hadien ki kynrum kynram wa da mih ha u bnai wa da dep iwa da pynman ya ki bei ki pa yong ki khynnah skur wa kiwa sikai wow mih yakhih ki.
Da ong u wa ka sorkar u pynchna smat ko ya waroh kiwa emkaam ha katai ka skur, nadooh ki thaw lai paikhana wa ki thaw sah Hostel, ka madan yalehke wa kiwi de.
Da khana u wa ka sorkar da phah ko ya ka poisa neibynta waroh i kreh wei da phah ya ka chnat PWD (Building) wow khut noh ya ka Tender wow kreh khnang wow pyndep chwa u man skur biang ha u snem wow wan.
