Kam chibynta ka thong ka Meghalaya wow poi cha 3,000 tylli ki Homestay wei wow pynskem ya ki kaam uiñke suwari hapoh ka jylla, neiliang u Montri Rangbah ka jylla, u Conrad Sangma ha ka 30 tarik uni u bnai da lai hiar u cha Smit kawa man kam kawi na ki chnong wa miat dur hapoh ka jylla kawa em leh yei parom yongrim.
U Conrad da lai u wow yaklam wa kiwa chong chnong, kiwa seiñ khih deilang ki Tourist wa poi cha kani ka thaw, da lai u leh cha ka yaaw Smit wei da yaklam u leh wa u tre ka RC Homestay deiwa lai pait leh ya kani ka thaw sah yow ap leh yei eh i khoo yong ki kam kiwa pynlai.
Ha i yaklam wa kiwa boon, da khana ki cha u Conrad yei chem chitom heiyatoh wa i wym i biang pynlang jhep, i wym em Street Light wei taroi ka thaw ka bhaw.
Neiliang u Conrad da kular u wow chimkhia yeini wei ini man ko leh kam chibynta wow yachem markhmat wa kiwa chong chnong yow ap u sñiaw yei i eh i khoo yong ki.
U Conrad da chong dih cha u leh wa ha iwi i dukan heiwa da pynchlur u ya ki Tourist wow lai uiñ ki cha kiwa boon ki thaw neibhah ka Meghalaya em ko kiwa boon ki thaw wa miat.
Neiliang u tre ka Homestay da e khublei u ya ka sorkar yeiwa da e yarap ko haddooh wa da ye wow pynheh pynsan yei khih i khan.
U Conrad da ong u wa ha Meghalaya kattæ da em kamwa 900 tylli ki Homestay wa da krehkaam wei daw yarap wow sdang sa 2,100 tylli ha ki por wow wan wei ka thong toh wow pynpoi hadooh 3,000 tylli ki Homestay ha kylleiñ ka jylla ha ki 12-18 bnai wow poi.
Discussion about this post