Mawkyrwat: U MLA warim ka Ranikor Constituency, u Martin M Danggo da ong u wa lada ki paidbah ym kwah de ki wow pynjop ya oo ha kani ka election chiteiñ samoi ym sñiawphær u neibhah wa da yoh ya ka Civil Sub-Division.
“Da yakhun i wow yoh ya ka Ranikor Civil Sub-Division wei nga da hun O wa lada ki paidbah kwah ki namo ym kwah ki wow kyrchaan ya nga u pdiang sñiawbha O ya ka rai ki padibah,” da ong u Danggo, uwa da dam noh wow man kam u MLA ha ka 21 Naiynru hadien wa pynbna u Montri Rangbah, u Conrad Sangma wow e noh ya ka Civil Sub-Division ha Ranikor.
Da ong u wa heipor wa em u wa ka Congress kam u MLA kamjooh leh kam u montri ha ka sorkar, ka Ranikor ym jooh yoh ko ya ki kaam pynroi.
“Toh ka mynried neibynta ki khon yong i wei ka Sub Division u myntoi waroh wei daw pynsuk ko ha ki kaam skur wa kiwi kiwi,” da ong u Danggo, uwa da ieh noh yei man dkhot na ka Congress ha u bnai wa dadep.
“I daw wa resign O toh wow yoh ya ka Sub Division, ye phi u sñiawsih wa resign O neibynta ka Sub Division tangwa kylli O heini na ki seiñ saiñ pyrthai wa neiyi i daw yakhun Election i? lada ymtoh neibynta i roi i paar,” da ong u Danggo.
“Daw leh O katwa ngait wei lada ym man MLA de O leh wei u man MLA biang O toh wow pyntikna wow wanrah Civil Sub-Division,” da ong u Danggo, uwa da jubab yeiwa pynbaad kiwi wa resign u wow yoh myntoi samen.
“Lyngba i wyrai ka sorkar MDA yei man i long ka thaaiñ Ranikor wa yoh i ya ka Civil Sub-Division,” da ong u Danggo uwa da pynpche yei em kiwa ong wa kwah u wow yah bakla ya ki paidbah.
“Nga pdiang sñiawbha O wa lada em kiwa kob wow pynku kyrdan ya ka Civil Sub-Division hapoh chiphaw snem wei lada ymye ham klam beiñ,” da ong u Danggo uwa da yaroh ya ka sorkar MDA kawa em i thmu wow wanrah yei synchaar chajan waki paidbah.
Chooh chooh da ong u wa dang boonkaam ki wow pynkhreh ya ka Civil Sub-Division wei ympu em pyrkhat u neibynta ka Election deiwa kyntait leh khana ya ka sngi wa i por wow psiah u cha ka NPP deiwa ong leh wa ym chimpor de wow haap yakhun u na ka party.
Heiyatoh wa i booh kyrtong ki ar tylli ki seiñ wa emlang ha ka sorkar wow yakhun pyrchah ya oo na Ranikor, da ong u wa ym em i khang ya uwon uwon wow yakhun ya ka election wei pdiang sñiawbha u ya kiwa yaleh pyrchah ya oo.
Chooh chooh da ong u wa ym em kwah u wow ong iyi iyi leh hajrong i pyrchang ka Congress wow pynrem ya oo ha kani ka Election wei chong ha i stat yong ki wow yakhun wow wanrah ya ki kaam pynroi.
“Lada ye ki wow yoh yei kyrchaan na ki paidbah wei jop ki boi ye ki wow wanrah ya i kaam pynroi wa rap bha wei lada ye ki wow pynyoh da ka District ha ki san snem namo chiphaw snem, u pdiang sñiawbha O.” da ong u Danggo.
Discussion about this post