Hadien wa ka Election Commission of India da pynbna ko ya ki tarik pynman Election ha ka jylla Meghalaya, ynne ka National People’s Party (NPP) da sdang ko ya ka yalap Election MLA 2023 wa nyngkong na ka chnong Chenangre (Adokgre) kawa em ha Kharkutta, North Garo Hills.
I pyrtuid Chenangre toh iwa da siñ yei chnong Adokgre da u (L) PA Sangma, iwa mut hei ktien Garo i chnong wa pynyoh yei jop wei kani ka chnong leh man ko kam ka chnong wa u PA Sangma jooh sdang u yei yalap Election.
Ha kani ka yalang paidbah kawa da em palat 20,000 ngut ki bru kiwa da wan, da pynyoo leh yei im u PA Sngma lyngba ki dur, ki dar, ki klam yong oo wei da tem leh yei sur wa ka-it bha u iwa tip kam i Oh Ang Aman Asong heiwa da ya rwai lang ki paidbah.
Ya kani ka yalang paidbah da pynman ha Chenangre Stadium kawa dang dep wai ini wa dep kawa da kular da u PA Sangma heipor yong oo kawa da ye wow pyndep da u Montri Rangbah ka jylla, u Conrad Sangma.
U Conrad Sangma uwa man leh kam u NPP National President, da ong u wa ka NPP u lai ko chakhmat yow pynmankaam ya waroh kiwa da kular u pa u wei ha kini ki 5 snem ka Party da ye ko wow pynmankaam ya iwa boon iwa angnood ka jylla Meghalaya.
Da e khublei u leh ya ka heh ka TMC, ka Mamata Banerjee kawa chisien da kyrchaan ya u PA Sangma wei deiwa burom ya ka da ong u wa hap ko u husiar bha pyn ya ki bru ko deiwa ong boon na kiwa yahkhmat ko hapoh ka jylla toh kiwa da thmu wow yut noh napoh ka Party hadien wa kut ka Election.
Da ong u wa ini ym toh iwa chna ktien u tangwa ini toh iwa da klam cha ki yaaw ki haat wei kini kiwa da psiah chapoh ka TMC na kiwa boon ki Party, da dep lai yaklam ki wa kiwi ki Party.
Da ong u leh wa lada ya ka TMC ong ko ha West Bengal wa ka BJP toh ka Party ki baar jylla, ka TMC leh man ko ka Party ki baar jylla hapoh Meghalaya.
“Ka TMC toh kawa dang thymme ha Meghalaya wei daw chimpor wow sooh thied heini. Kiwa yahkhmat ki toh kiwa da rim kiwa da yut na ka Congress kiwa da dep yohlaad wow chakri ya ka Meghalaya heipor wa em ki ha ka Congress tangwa ym em ye ki wow leh iyi iyi. Ka TMC ym pu sñiawthooh ko ya ki paidbah ka Northeast, wei daw chimpor ki, ki toh kiwa na baar jylla kamwa ong ka TMC ya ka BJP kamjooh ya kiwi ki National Party kiwa wan na baar ka Bengal wow yaleh Election,” da ong u Conrad.
Da kyntu u leh ya ki paid ka Ri-loom Garo wow kynmoo ya ki kaam wa da leh u PA Sangma wei wow thap Vote ya ka NPP.
Ha kani ka yalang da yoh leh yei klam na u Symbood Montri Rangbah, u Prystone Tynsong uwa man leh kam u National Vice-President ka NPP wei da emlang leh u, Deputy Speaker, u Timothy D Shira, u Montri sorkar, u James Sangma wa kiwi ki dkhot thymme ka Party kam ka Amapreen Lyngdoh, u Mohindro Rapsang, u Kimfa Marbaniang wa kiwi kiwi de.
