U Montri Rangbah ka jylla uwa man leh u President Rangbah ka National People’s Party (NPP) da phah takit bniah u hajrong i lai booh IED Bomb hakhmat ka yung krehkaam yong ka NPP kawa em ha Lachumiere, wa boi ya toh pathan i buit Politics neidaw wa ka jylla da jan ko cha ka Election chiteiñ samoi ha ki 3 tylli ki Constituency.
Hawa klam ynne ka sngi, u Montri Rangbah da ong u wa ka chnat pulit daw leh ko ya iwa emkaam hawa yatoh wa i takit wa kiwi de kiwa emkaam, deiwa ong wa u wa ka sorkar da e bor bait ha ka chnat pulit.
Ha iwi i liang, da ong wa kam ka seiñ saiñ pyrthai ym sñiaw yahaap ya kam ini i leh wei da beiñ u leh ya itai wa jia. Heijooh i por da kyntu u ya ki wakreh wa kiwa kyrchaan ka NPP wa ym toh u tieñ ki neibhah kam kiwa yahkhmat ki emlang ki na ka sorkar.
Da ong wa kam ini ym toh iwa daw pyntieñ ya ka Party heiwa da ong u leh wa toh u em i daw wa ileh wa ha kam ini i por da mih ini i jia, khamtam chi sngi chwa wow psiah NPP kiwa yahkhmat na Mawphlang wei chwa ka Election chiteiñ samoi, wei ini daw man ko iyi iyi wa hap u pait bniah.
Hawa kylli, da ong wa ka chnat pulit daw leh ko ya iwa emkaam, wei da pyntip u leh wa daw paan ya ka Report na ki heh pulit hajrong itai i jia.
U Montri Rangbah da ong chooh chooh u wa ym ye wow kheiñ stiñ hawa yatoh wa ki kaam saiñ pyrthai hajrong itai i jia, deiwa pynrap wa neiliang ka sorkar daw bichaar biang ko yei em ki bor pulit wa toh u lai sonteri wei wow pynkhlan chooh chooh.
